O Cicciollâ 1930/In sciô vestî de donne

O Cicciollâ de Feipo Noberasco
In sciô vestî de donne de Luigi Gavotti

lasciòu inalterâ a grafia do "Cicciollâ".

In sciô vestî de donne

Pensando a-a moda estiva do vestî
E a-o pünto a-o quae ste donne son vegnüe
Me pâ che se porieiva quaesci dî
Che e figgie d’Eva presto sciortian nüe;
Nè ghe saiâ ciù donne vergognose
De scrovî e cöse ch’aöa van ascose.

[p. 105 modifica]

Che se o vestì a camixia svolazzante
O ghe ten fresco in-te intime bellezze,
Seggian grassotte o magre, a tutte quante
O ghe tradisce sempre ciù e fattezze;
E o bello che pe andâ nüe pe meitaè
Ghe tocca spende un muggio de dinaè!
Se ûnn-a scignöa a moda avvixinaè
De fronte poëi studiâ l’astronomia,
In t’a via lattea du decolleté;
E se dall’âtra parte a ve se gia
Ghe vedei tutta a schenn-a a-o naturale
Zû fin a-o meridiano corporale.
In te strade che son ciù frequentaè
O nudo o l’è vegnüo ûnn-a frenescia;
E grassotte pe fâ vegnî de cuaê,
E magre pe insegnâ l’anatomia.
Brasse nüe dappertutto! e brutte e belle!
Che ve fan vedde o pei fin sotto e ascelle.
No ve parlo de stoffe e de modelli;
In casa, cö-i vestiari giaponeixi,
E donne fan a meno de pomelli;
De stoffe i nomi son tutti franzeixi,
Ma quelle estive son coscî sottî
Che se abbrassaè ûnn-a donna no a sentî.
Insomma, comme o veste oggi o bel sesso
Me pâ ch’a seggie quaesci ûnn-a indecenza.
I nostri vêgi avièn negôu o permesso
De fâ vedde con tutta l’evidenza
A-e figgie o presumî di düi cavin,
A-e donne o fox trottâ di düi tettin.