O Cicciollâ 1930/Malinconie
| ←Semplicitae cicciollea | O Cicciollâ de Malinconie de Gioxeppe Cava |
A torta de seixo→ |
| lasciòu inalterâ a grafia do "Cicciollâ". |
Malinconie
Son nato proprio sôtto a-a Campanassa
E a voxe sò ciù votte a m’ha adesciou:
Ho faeto i primi passi in sce a sò ciassa
E i primmi zêughi ingenui ho là imparou.
Sôtto o sò archioto, poi, ûnn-a zuenetta
M’ha misso e primme spinn-e drento a-o chêu,
Zûgou tant’ote aveimo a-a pignatetta
E ben se voeimo finn-a da figgiêu.
L’aveiva i êuggi e o nomme da Madonna,
Biondi i cavelli e-o naso ûn po’ a l’in sciû,
Ma a quella poscitoèse de sò nonna
Che a me parlesse a no ghe andava zû.
A-a vegia paivo o figgio du demonio
E mi pe daghe paxe l’ho lasciâ:
Però gh’o in pëto un çerto testimonio
Che ve pêu dî se mai me l’ho scurdâ.
E manco m’ho scurdae i mae buin amixi
Di zèughi, de baruffe e di mendin;
Pe quanto o tempo o n’agge reisi grixi,
Ne-a mente e-i veddo sempre ancon piccin,
Descâsci, a testa nûa, zû pe-i caruggi,
Zûgando a tocca-faero, a-o diao, a-a loêua,
Sporchi de taera e i sûoi pe-a faccia a raggi,
Ansciando pe-o corrî, co-a lengua in fêua,
Pe-i ponti di câfatti a fà de ciumbe,
A-a pesca di gigioin, a tiâ di tosci,
Pe-i orti a rancâ, siöule pe fà trumbe
O pe-a Villetta in çerca de rampôsci.
Ëmo da Campanassa e da Caladda,
Di Fraighi, Mercanton e di Casciae,
Un mûggio de batôsi, che ogni stradda
Vorreimo sottomissa cômme a ûn poe.
Pe çerce faete a sciabbra armae e de fiönde
No stamo guaei a guaera a dichiarâ,
Bastava ne squadressan con e gronde
Pe sûbito a battaggia incomensâ.
Che belli tempi, allöa! O vitta, pinn-a
De zêughi, de scappadde e de piaxei:
Scömbatelle, pe-i Sparti, in meso a-a finn-a
Erbetta, sempre verde, dove sei?...