O Cicciollâ 1930/Lettia a Beppin da Cà

by Feipo Noberasco

←O paisan ä procescion do Venerdì Santo a Sann-a

O Cicciollâ de Feipo Noberasco Lettia a Beppin da Cà de Françesco Marengo

I duzze meixi→

lasciòu inalterâ a grafia do "Cicciollâ".

Lettia a «Beppin da Cà »
pregandolo de ’na risposta

Cäo Cava, semmo vegi e do settanta,
d’ûnn-a daeta, ca mette ûn pò d’orgoglio,
quando l’augëo d’Italia a-o mondo canta:
— O regna re Vittorio in Campidoglio! —
Nati trammezo a-e rêuze da Rivëa,
davanti ûn bello mâ co-a strenze e abbrassa,
emmo cantôu con voxe forte e ciaea,
do nostro grande amô pe « A Campanassa »^[1],
da lûnna ch’inargenta o çê e o mâ, _
de tûtto quanto ûn pô, fin do Cicciollo
pe-o quae Sann-a l’è a-o mondo celebrâ.
Ma aoa semmo zà vegi, con o collo
che o pende comm’a-o fratte cappuççin;.
manca a vitta, o vigô, corda a-o relêujo,
e o nostro lûmme, con poco stuppin,
se va smorzando pe mancanza d’êujo.
A fa aegua a nostra barca da ogni parte,
a no governa ciù senza o timon,

emmo perso l’inzegno, l’estro e l’arte,
o l’è ûn naufragio senza sarvasion.
Cava, repiggio o cavo e o remescello:
O sciö Scovazzi co sciö Noberasco
no s’accorzan che gianco l’è o cavello?...
Han bello dî: — Cantae! — no basta ûn fiasco?^[2]

1. La storica campana della torre del Brandale, simbolo di savonesità.
2. Allusione ad un concorso di poesia dialettale savonese.