O Cicciollâ 1930/Ciù vivo che primma
| ←Canta o Cûcco | O Cicciollâ de Ciù vivo che primma de Françesco Rochin |
O neja!...→ |
| lasciòu inalterâ a grafia do "Cicciollâ". |
Ciù vivo che primma
Al pittore Giovanni Grifo
I
(1492)
I ormezzi cheìti in bando,
O gran Navigatô drito in sce a prua
O tronn-a ne-o comando
Da partenza, e a bandëa èrta a scigüa
Daeta a l’onô do vento.
Tûtt’agghindâ comme ùnn-a sposâ bella
E pinn-a d’ardimento
A comensa a mesciâse a caravella,
S’impe l’aia de crii:
Viva Colombo! — o Segnô l’accompagne! —
E chí, centi e sospii
E cioccâte de moén che van due Spagne.
Coscì o partiva ûn giorno
Co-a so câ Santamaia, o gran Zeneìze,
Forse do sò ritorno
Çerto, e non çerto de rifâse e speise.
Coscì o partiva; ûn mondo
Neûvo o ghe rieìva ne-a lûxe da mente,
Finn-a che, daeto fondo,
O l’ha posciûo baxâne o continente.
Poveo Cristoffa! frûto
Do tò lungo soffrî, thae arrecheûggeìto
O no quëtâ un menûto,
O vive a strangoscion, da teìto a teìto;
Coscì che a-a tò famiggia
O gran cheû t’hae portôu pin de scâvenn-e;
T’hae faeto paccotiggia
De sangue marso, e o guägno de cadenn-e.
E cos’importa? A-o mondo
Se ne veddiâ de pëzo, n’aggi puia!
O vegio e o neûvo mondo
Intanto aoa te cantan l’alleluia!
II
(1892)
L’é neûtte; a lûxe elettrica
A l’ha avèrto e parpelle,
E veggian sciù pe-a lattea
Stradda ciù vive e stelle
Pe a biccerata unanime
Che l’Immortalitae,
In te l’Olimpo, a dedica
A-o genio di mainae.
Tra un incanto vaghiscimo
De scioî, perle e diamanti
(Tûtti da ciù bell’aegua)
Aççeizi e scintillanti,
I convitae magnifici
Da gran solennitae
Stan parlando e di miäcoi
Compii dâ Civiltae.
Gh’è tûtta a lunga serie
Da bella Rinascensa:
Galileo, Michelangelo,
(Due arche de sapiensa)
L’Ariosto, o Tasso, o Sansio,
O Benvegnuo Cellin;
Lutê, Piola, Cartesio,
O fratte ghibellin,
Swartz, Edelin, Leon Decimo,
O Pallestrinn-a e o Vinci
(Ch’arvindo âtra parentexi
Ghe dae un baxo, perdinci!)
O Macciavello, o Doia,
O Pindaro italian,
Guttemberg, l’Amo, eccetera,
Chè o granfio ho za ne-a man.
E fra i moderni artefici
Do saveì gh’è Roscini,
Galvani, o Volta, o Foscolo,
O Steffenson, Parini;
O Franklin, strenuiscimo,
Canova e Mazzarin.
Newton e o dolcissimo
Poeta do violin.
Han tûtti addosso o giûbilo
Do paradiso vëo,
E tûtti quanti o ï occupa
Un nobile penscëo:
Prestâ onoransa a o Genio
Ne o quarto çentenâ
Da scoverta d’America,
Faeta da o Gran Mainâ.
L’aia impregnâ de barsami
I spiriti a commeûve,
Comme de çento muxiche
Sgheûa l’armonia in neûve
Notte e o stellôu ne palpita
Tûrchin do padiglion,
E i angei cantan limpida
De gloria ûnn-a canson.
Comme coppia che a-o viagio
De nosse a s’incamminn-a,
S’avansan, rienti a faccia,
Colombo e a seû divinn-a,
(Do çe lûxe perpetua)
Sacra Immortalitae,
Riçevûi da fin lunghiscimo
Applauso d’invitae.
Ve presento Cristoforo
(Comensa l’Anfitrionn-a)
Incoronôu d’öfeûggio
E da ciù pianta bonn-a:
Ebe c’ha l’impe i caliçi
Do nettare ciù fin;
Ciabraea ch’o dighe i brindixi
A-o « seû conçittadin ».
O savoneise spirito,
Sensa gnèrtoe sfibrose,
A viva mente poetica
Pinn-a de mille cose
Ribattezzae da o genio
Ch’o no moiâ ciù,
O s’arsa, e o dixe o brindisi
A-a ligûre virtù:
« Grato e ligio
« Al fastigio
« De l’invito lusinghiero,
« La mia levo
« Tazza e bevo
« Al fatidico Nocchiero,
« Che al sonante
« Mar d’Atlante
« Diè le vele, e dall’ignoto
« Il fecondo
« Vergin mondo
« Trasse, e sciolse il suo gran voto.
« La memoria
« Nostra è storia
« Giù ne la rotante sfera,
« Ch’or festeggia
« Lieta, e inneggia,
« Divi illustri, a quell'austera
« Maschia imago
« Per cui vago
« Di Colombo il nome suona,
« Nel superno
« Sempiterno
« Brindeggiar che ovunque tuona.
« Nel gioire,
« Nel tinnire
« Delle tazze rituali,
« Splenda il raggio
« Dell’omaggio
« Più sincer degl’immortali.... »
L’é giorno: a lûxe elettrica
A l’ha serrôu e parpelle,
E dorman sciù pe-a lattea
Stradda a miggaea e stelle;
Pü da gran festa olimpica
L’eco a l’ondezza ancon
Pe o çê spassôu da-e nûvee,
Bello ne-a mae vixion.