O Cicciollâ 1930/A-o bosco de Ninfe
| ←Gelosia | O Cicciollâ de A-o bosco de Ninfe de Antogno Vasallo |
A Cisa→ |
| lasciòu inalterâ a grafia do "Cicciollâ". |
Gelosia
- Ricordo: o l’ëa do meize de frevâ:
Unn-a seiann-a molto calma e ciaèa;
O l’ëa finïo l’opera a-o Ciabrèa,
E pe-e stradde languiva o carlevâ.
L’opera, bella assae, me l’ëa gûstâ
Assettòu in pötronn-a de platea;
Ricordo che o soprano a l’ëa ’na dea,
Che in vixibilio a me faxeiva andâ.
Ma mae moggê, ûn pettinin gelosa,
A l’ha sbottôu: — Ah! dunque, a t’è piaxûa!? —
— A primma donna? scì! che creatûa!....
Un àngeo!... — Zà! ma un àngeo tûtto tinto....
__ E ti è mai visto (questa a l’è cuïosa)
Un àngeo, ti, che o no segge dipinto? —