Ms. Ricci 176/Improvisata in villa
| ←torna a l'endexo | Poesie in lengua Zeneise de Improvisata in villa, dond'era con atre Damme ra Signora Laura |
A unna B. D. dita ra Barilotta→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Belle, che bello stasene tra vuoi
In paxe areversę per sta Campagna,
Onde spira l'auretta aure d'odoí,
Treppa in scosa[sic] all'herbetta ra vivagna,
Con ste cee Belle in Paragon de scioí,
L'oeggio e ro naso me se pa in Cocagna,
Ste bellezze, quest'ere, e sto diporto,
Faren drizá fin l'appetitto a un morto.
Allegra in questo proù l'aura tranquilla
Baxa cian cian l'erbetta, e via trapassa
L'aura intorno a re scioí demora, e brilla,
Ro ventixuoe giroso re descassa,
Fin ra mosca sarvega s'inaxilla,
Perchè appè tante Venere ghe passa;
Ma in fin sotta l'erbetta bell'e liscia
Per proverbio intanaò ghe stà ra biscia.
Donca a ro ben ro má sempre è attaccoù
Bellezza è un vento, ch'a ra fin svanisce,
L'ave me dà l'amé si delicoù,
Ma puoè con ro saggoggio ne ferisce,
Ra ruoesa l'ha dre spinne da ro loù,
Ro so mesmo soggetto l'è all'ecclisse,
Amó l'è bell'e bon, ma puoé l'è guerso
Ogn'indrito a ra fin ha o sò reverso.