Ms. Ricci 176/A ro Sottocanzelé Castellin per unna segurté de vitta
| ←torna a l'endexo | Poesie in lengua Zeneise de A ro Sottocanzelé Castellin per unna segurté de vitta |
A ro Sig. Fransesco Maria Armerigo a ri Straordinarij→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Caro scio Castellin,
Questi doi zovenotti,
Pensando sciù ra fin,
De passá per bardotti
Per fá ro trucco d'in tra segurté
Ogn'un de ló vuoe chì mená sò fré.
E in tá conformité
Heri per favorí comme se fa
Un poco sta Poetica licenza,
Ri doi eccellentissimi de cà
Han buttoù con so gusto ra sentenza;
Hour'in giusta apparenza
Se quelli doi signori se contendan;
E per giusta raxon gusto ne sentan,
Per intraghe con gusto ancora mie
Posso offerighe a ló mé fré mi assie:
Ma vuoi direi cosie,
Ch'in fin ri nostri fré de tutti trei
Idoei non ve puoeran za parei,
Mentre che zà savei,
Che puo dá breiga in questa segurté
Ra posteriorité,
Che per fá, ch'a no vuoere unna pateca
Han za obrigoù ro sò sub hippoteca.