Pagina:Ricci176.djvu/106

A ro Sig.^r Lucca Azarin pe ra dilation dre nozze dro Sig.^r Cosmo Centurion e ra Sig.^ra Maria Francisca de Marin.

Che ve ne pá sció Lucco!
Quest'è ben cravanchinna,
Che quando ro sció Cosmo pens'andá
A fase dí de si da ra sposá,
Te ghe trà fuoera, che l'è sò coxinna;
E per sò in tutta somma
Ghe besuoegna aspetá
Ra despensa da Romma.
Ma sei che l'è, da puoé
Non se ra piggia a cuoe,
Perchè ste gioie son tanto ciù care,
Quanto ciù l'hommo s[c]ciuoeppa d'aspetare,
Dighe, ch'o l'haggie donca unna stizzinna
Ancon de patienza,
O arriverà ben presto a ra coxinna,
Ma besuoegna passá pe ra despenza.

A ro Sottocanzelé Castellin per unna segurté de vitta.

Caro scio Castellin,
Questi doi zovenotti,
Pensando sciù ra fin,
De passá per bardotti
Per fá ro trucco d'in tra segurté
Ogn'un de ló vuoe chì mená sò fré.