Lunaio Regiña 1891/6
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
CANSONETTA
Quande spunta ûnn-a zoenotta
D'êuggio vivo, ûn pö brûnotta,
Ch'a no n'è secca nè grassa,
Ch'a l'ha i vazi in sciâ terrassa,
Tûtto o sangue a fa smangiâ.
Donna bælla fortûnâ!
2.
Quande spunta ûnna biondinn-a
Bælla, savia, modestinna-a,
Con quell'äia coscí soave
Che ve ven da dïghe Ave;
Sens'ammiâla no poeì stä.
Donna bælla fortunâ!
3.
Unn-a brava e bælla figgia
A l'è l'angeo da famiggia,
A l'è a gioia di parenti,
O sospïo di conoscenti
E de quello chi a spoziâ.
Donna bælla fortûnâ!
4.
Un'angelica bellessa
Quand' a l'è li a sentî messa
Tûtt'assorta ne a preghea,
Con l'incanto da sò ciea
Scinn-a o præve a fa vortä.
Donna bælla fortûnâ!
5.
Unn-a donna bælla, instruïa,
Spiritôza, regaggia,
In ti splendidi salotti
Da scignori, artisti e dotti,
Scinn-a a-e stelle a l'è portä
Donna bælla fortûnâ!
6.
Chi pêu dive l'imprescion
Ch'a fa in tûtti da-o barcon?
Zù d'in stradda, zù d'in ciassa
Da chi è færmo e da chi passa
Ciû sospïi a fa cacciä.
Donna bælla fortûnâ!
7.
Quand'a va pe l'Accassêua
Pä che e rêuze spuntan fêua,
Pä che scinn-a i öxelletti
Sciortan fêua da-i giardinetti
Pe vegnïla a festezzâ.
Donna bælla fortûnâ!
8.
Quande fan quarche paradda
In sciö prôu comme pe-a stradda;
Quande fan ûn defilê
I sordatti, s'a ghe[sic] lê,
Pan ciû fieri in to marciä.
Donna bælla fortûnâ!
9.
Ne-i spettacoli teatrali
Tûtti stan co-i canocciali,
Con o collo sciû instecchïo,
Sensa manco tiä respïo,
O sò palco a contemplä.
Donna bælla fo[r]tûnâ!
10.
Chi pêu dïve o sentimento
Che v'inspira in t'ûn convento
Un'angelica creatûa ?
Tra quell'äia de clauzûa
Ciû sorrïso ve ghe pä.
Donna bælla fortunâ!
11.
A bellessa a fa vegnï
O costûmme ciû gentî,
A l'inspira tûtti i temi
Di romanzi e di poemi,
E de l'arte a ciû stimmâ.
Donna bælla fortûnâ!