Lunaio Regiña 1891/7
| ←Donna bælla fortûnâ! | Lunaio zeneize compilao da-o sciô Regiña & C. pe l'anno 1891 de Donna bælla desgraziâ |
A filosofia do cianze→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
CANSONETTA
Unn-a comba, ûn'angiëtinn-a
Bælla, zovena e fantinn-a,
Quand'a sciörte a vedde e stelle
A g'ha mille sentinelle
Che i so passi stan a spiä.
Donna bælla desgraziâ!
2.
S'a va solo co-e compagne
A demoäse pe-e campagne,
S'a va solo co-o galante
A parlase ûn pö distante,
Mille lengue a fa mormoä.
Donna bælla desgraziâ!
3.
L'intrigante, l'invidiöza
A l'aspëta d'arrescöza
O galante quand'o sciörte
Pe poei dïghene mä a morte,
E pe fäghela streppâ.
Donna bælla desgraziâ!
4.
Doppo fæto o sposalizio
A l'ha zà ciù d'ûn indizio
Che, con ëse onesta e brava,
Da sò maio comme scciava
Spesse votte a sä trattä.
Donna bælla desgraziä!
5.
Se pe andä ciû ben vestïa
A s'ammûggia quarche lïa
Travaggiando nêutte e giorno,
Tra i maligni do contorno
Gh'è chi dixe: « A g'ha o compâ! »
Donna bælla desgraziâ!
6.
S'a se veste zû a la bonn-a,
Dixan tûtti: « A strallattonn-a
A se i spende pe-e ostaie
Co-i patiti in leccardaie
Mentre o maio o va a laoâ. »
Donna bælla desgraziâ!
7.
A quell'atra bælla e ricca
I scignori van de picca
Pe poeì faghe o cicisbeo,
E scibben che no n'è o veo,
Pe poei dï che l'han baxâ.
Donna bælla desgraziâ!
8.
S'a no ten conversazion
Ghe dan tûtti de l'orson,
Da sûpærba, da camalla,
Da vegnûa d'in t'ûnna stalla,
Da ciassea, da mädûcâ.
Donna bælla desgraziâ!
9.
Unn-a bælla in t'ûn convento
A l'addescia o mormoamento
E l'invidia de ciû brûtte
Che pe fäghene de tûtte
No fan atro che stûddiâ.
Donna bælla desgraziâ!
10.
Quande a bælla a vegne vëgia,
Tûtte e votte ch'a se spëgia,
Nell'ammiäse quelle rûghe,
Quelle moen che pan leitûghe,
Sensa cianze a no pêu stâ.
Donna bælla desgraziâ!