Lunaio Regiña 1891/2
| ←Prefazion | Lunaio zeneize compilao da-o sciô Regiña & C. pe l'anno 1891 de I accertamenti da tascia in scï fabbricati |
A celebre traversata do Mediterraneo in to ballon fæta da l'inzegnê Juan Brûn→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
(Dialogo tra o scið Reginn-a e a Cattainetta).
REGINN-A
Dond'andæ che l'è ancon scûo,
Coscì tosto, Cattainin?
CATTAINETTA
Sciâ nö sa? façço stramûo
Da-o mæ vëgio mezzanin
Che me l'han tant'aumentôu
Ben che tûtto diroccôu.
REGINN-A
Cattainetta, son dolente......
No n'ho bocca per parlä.....
CATTAINETTA
Sci, pe causa de l'Agente
No se sa ciù donde stä!
No se pêu proprio ciû vive!
Queste cose sciâ no e scrive?
REGINN-A
Ho versôu zà tanto inciostro,
Imbrattôu tanto pappê,
Dito ciû d'ûn Pater Nostro
Da fä cazze scinn-a o çê;
Ma me pä ch'o segge sciôu
Tûtto inûtile, straggiôu!
CATTAINETTA
Comm'a l'è che taxan tûtti?
Che no fan rivoluzion?
REGINN-A
Cattainin, son tempi brûtti,
Contro a forza, pe-a raxon!
Con che gente ve a piggiæ?
CATTAINETTA
Me a piggiæ con chi se sæ!....
Ghe pan poco vinti franchi
Pe ûn tocchetto de suiêu!
Cao vosciâ, ne semmo stanchi!...
Via, collala no se pêu!....
Che comizi e vie legali?
Meritieivan d'impiccali!....
REGINN-A
Oiboibò, l'han abolïe
Queste cose detestæ!
CATTAINETTA
Meno i laddri, meno e spïe,
Meno e tasce esageræ,
Meno ûn trôn chi se i derrisse!...
REGINN-A
Ghe l'ho cade e mæ panisse!
CATTAINETTA
Ah! voscià sciâ l'è da cocca?
Ah! sciâ tegne coi mangioin?
REGINN-A
Ghe l'ho cada! Ghe l'ho sciocca!
Ghe l'ho dosci i mæ çetroin!
Cattainetta, donde sei?
Se ne rïan, no ghe veddei?
Son zûghetti elettorali
Do sciô Crispi e compagnia
Pe poei fä che i radicâli
De de là no i scaccian via
Comme i ommi necessai
Pe levane in questi guai,
Sensa dîlo in Parlamento,
Senza mette in discûssion
I motivi de l'aumento,
Han sparôu questo cannon
Chi colpisce o contribuente,
Incolpandone l'Agente,
E veddiemo che o sciô Checco
Pe poei fane attaxentä,
Doppo avei zà paggia in becco,
Da paciere o se mettiä
Fra noiatri e l'Ezattô.
CATTAINETTA
Lô via lô, no mangia lô!
Fan pe däne ûn pö de grascia
Perchè no i caccemmo zû,
Ma s'aumentan quarche tascia
No l'ammærman proprio ciû,
Anche a costo che a nazion
A l'andasse in perdizion.
REGINN-A
Cattainetta, ammiæ che ciêuve....
CATTAINETTA
Sotto o pægua m'assostiö....
REGINN-A
No conven guastaghe e êuve....
CATTAINETTA
Pe de lungo ghe e guastiö....
REGINN-A
Ascädäse no conven....
CATTAINETTA
Parlo solo pe-o sò ben!....
Quand'avian ben rotto e stacche
Ai bôricchi, quand'avian
Ben finio d'alleitä e vacche
Mentre læte no ghe n'han
Che meschinn-a scarsitæ,
Se boschian casci e cornæ !....
REGINN-A
Bocca a bûscio, Cattainetta!
Via, ve prego, Cattainin,
Moderæ quella lenguetta!
No tocchæ çerti cantin!
CATTAINETTA
Oh, pe-i sordi e pei traviæ
Do ciû södo ghe vorriæ!....
REGINN-A
Cattainin, doppo ûn comizio
Coscì serio e moderôu,
Anche lö mettian giudizio;
Anzi avian zà meditôu
Che, colpindo i proprietai,
Ammassian i povei diai.
San che un mûggio d'indûstriali
Pe n'andasene in rovinn-a,
Pe no perde i capitali,
Serrian ciû d'ûn'officinn-a
Tra i gren sciäti, tra i gren sbraggi
Pe-a mancanza de travaggi.
Che derrûando tante case
Sensa fane fabbricä,
Manco là per Boccadäze
Ne porriemo ciû trovä
Un tocchetto de stansin
Da modæsti fradellin.
San che i grosci appartamenti
Donde gh'è tante famigge
De costûmmi differenti
E confûzi mascci e figge,
Son ûn danno capitale
Pe l'igiene e pe-a morale.
Anzi o nostro Municipio,
Doppo tanto ûn pö animôu
Da bon senso e bon prinçipio,
Pä ch'o l'aggie protestôu
In scï fäsi aççertamenti.
Do valô di appartamenti,
E se spera che o governo.
Un pittin tornando in lê
Co-a presenza de l'inverno
E co-e nûvie che l'è in çê
O vegniä a de transazioin.
CATTAINETTA
G'ho de piæ che pan balloin!
Miæ ûn pö li! o l'ha misso e tasce
In sce l'äia che respiemmo,
In sciä roba chi ha da nasce,
In sce quello che no n'emmo,
E sciä o credde coscì bon
Da vegnï a 'na transazion?...
REGINN-A
Cattainetta, stæ persuasa
Che no passa questa stæ
Che troviei ciû d'ûnn-a casa
A di prexi moderæ:
Dunque e case staian vêue.
CATTAINETTA
Ghe l'ho pinn-e e mæ nissêue !...