 |
Questa pagina a no l'è stæta corretta. | |
Fan pe däne ûn pö de grascia
Perchè no i caccemmo zû,
Ma s'aumentan quarche tascia
No l'ammærman proprio ciû,
Anche a costo che a nazion
A l'andasse in perdizion.
REGINN-A
Cattainetta, ammiæ che ciêuve....
CATTAINETTA
Sotto o pægua m'assostiö....
REGINN-A
No conven guastaghe e êuve....
CATTAINETTA
Pe de lungo ghe e guastiö....
REGINN-A
Ascädäse no conven....
CATTAINETTA
Parlo solo pe-o sò ben!....
Quand'avian ben rotto e stacche
Ai bôricchi, quand'avian
Ben finio d'alleitä e vacche
Mentre læte no ghe n'han
Che meschinn-a scarsitæ,
Se boschian casci e cornæ !....
REGINN-A
Bocca a bûscio, Cattainetta!
Via, ve prego, Cattainin,
Moderæ quella lenguetta!
No tocchæ çerti cantin!
