Lunaio Regiña 1891/10
| ←L'inconveniente d'aveì i denti | Lunaio zeneize compilao da-o sciô Regiña & C. pe l'anno 1891 de A filosofia do rie |
L'ommo barometro→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Comme l'è bællo o rïe
Vergine de rimorsci,
De finte, de böxïe,
Spontaneo, sensa sforsci!
2.
O rïe o fa bon sangue,
O fa rescioä i pormoin,
O fa che no se langue
Ne-i laççi de pascioin.
3.
Un rïe de contentessa,
Un rïe chi fa rescioä
Co-i graddi e co-a ricchessa
O no se pêu accattä.
4.
O rïe de l'innocenza
O brilla ne-i figgiêu,
Ne-a faccia, ne-a presenza
De l'ommo de bon chêu.
5.
Nell'êuggio moribondo
Chi rïe salûando o sô
Se ghe descrêuve ûn mondo
De spaximo e d'amô.
6.
Ma se vortæ a medaggia
V'aççerto che veddei
Un rïe chi ve fa raggia,
Verghêugna e despiaxei.
7.
Però me son prefisso
De no me dilungä
Ne-o dave quarche schisso
Do rïe che veddo fä.
8.
Chi rïe strenzendo i denti
Che l'astio ghe veddei
Ne-o fave i complimenti
O dixe: me a paghiei!
9.
Quello ch'arruffa e naixe
E ch’o ve pä ûn lensêu
Chi vegne da-a bûgaixe,
Dï ch’o no rïe da chêu.
10.
Chi rïe sensa motivo,
Nè scopo, nè raxon,
O l'è o ritræto vivo
Do scemmo e do mincion.
11.
Chi rïe do mä de tûtti
Pe invidia de mestê,
O l'ha un di chêu ciû brûtti
Che battan sotto o çê.
12.
Chi rïe vortando a faccia
Ne-o veddive spuntâ,
O sta lì a fave a caccia
Pe poeive bûzzarâ.
13.
Quello chi rïe sciaccando
De l'êuggio, o l'è ûn fûrbon;
Quello chi rïe bägiando
O v'indica ûn pötron.
14.
Quell’ätro là chi rïe
Chinando i êuggi a-o sô,
O traffega co-e spïe,
Co-e guardie do Questô.
15.
Schivælo comme o fûmme
Chi rïe se ve mostræ
Fedeli a-o bon costûmme.
A-o trionfo da veitæ.
16.
Però no ve proibiscio
De rïe quante ve pâ:
Anzi ve compatiscio
Se no ve poei sfogâ.