Lunaio Regiña 1891/11
| ←A filosofia do rie | Lunaio zeneize compilao da-o sciô Regiña & C. pe l'anno 1891 de L'ommo barometro |
I mecenati do giorno→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Conoscio tanti e tanti
Individui che son
Barometri ambulanti
Con tempo grammo e bon.
2.
Squaddrando questo e quello
De veddighe me pä
Do nûvio in to çervello
Ne-o gesto e ne l'andä.
3.
E se ve diggo o veo,
Cariscimi lettoî,
Con ægua, sô e zeo
Poei veddilo da voî.
4.
Quande veddei ûn tale
Ch'o se rebella i pê
Aggiælo pe segnale
Che s'accabanna o çê.
5.
Indizio ei da-i sò calli
De l'ægua chi vegniä
A goççe, a intervalli,
O forte e continuä.
6.
Un chi se tegne e masche
Urlando comme ûn can,
O v'indica e borrasche
Che spuntan da lontan.
7.
Un chi se fascia e inghêugge
De lann-a e de coton,
Che pä ch'o l'aggie e dêugge
E i nervi in convûlscion.
8.
O v'indica che fêua
O chì deve vegnï
Da neive, da gragnêua,
Do freido da abbrensuï.
9.
Quell'atro chi se tegne
Lì da-o çervello e moen
O v'indica che vegne
Un cado da Africhen.
10.
Insomma i corpi umani
Son tûtti influenzæ
Da-i cangiamenti strani
De cose inanimæ.
11.
Quande lampezza e tronn-a,
E ciêuve, i assascin
Assätan a personn-a
Magara de mattin.
12.
Tutti i ammazzamenti,
E riscie ciû ostinæ
Succedan quande i venti
Son cadi o abborraschæ.
14.
Sentï che sbraggi e lûi
Da-o Manicomio ven
Quande l'è i tempi scûi
E nasce di uraghen?
15.
Quande fa l'äia finn-a
O cada a ciù no dï
I meistri a disciplinn-a
No pêuan ciû mantegnï.
16.
Ancon primma che tronn-e,
O che rostisce o sô
E serve co-e patronn-e
S'insprïtan fra de lö.
17.
E primma che ciûvozo
Se manifæste o çê
Sentan o mä nervozo
I maii co-e moggê.