Lunaio Regiña 1891/9
| ←A filosofia do cianze | Lunaio zeneize compilao da-o sciô Regiña & C. pe l'anno 1891 de L'inconveniente d'aveì i denti |
A filosofia do rie→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Tra e miggiæa d'inconvenienti
Che sopporta ogni cristian,
Quello gh'è d'avei di denti
Che d'in bocca ne cazzian
Pe mosträne a brevitæ
Do vigô da primma etæ.
2.
Bællo ei stä davanti a-o spëgio.
Donne cäe, pe nettezzali,
Ma n'ei miga o privilegio,
A virtù de conservali
Così ûnii, coscì lûxenti,
Coscì gianchi i vostri denti.
3.
Ricorriei a quelli finti;
Ma, sentindove parlâ,
Ne mettiei a di procinti
Che ûn bon pægua ghe vorriâ
Pe assostäse da-o ciûvûsso
Che mandiei fra tanto lûsso.
4.
E se foisci leccardonn-e ?
Quande i denti ve son croæ
Poei pigg[i]ä o Segnö da-e bonn-e,
E bezêugna che mangiæ,
Pe di tordi co-o beschêutto,
Da pappinn-a e do pan chêutto.
5.
Quello mei così[sic] fatale
O l'avieiva ingenerôu
O peccato originale
Se i mincioin che n'han mangiôu
Pe l'inganno do serpente
Foisan stæti sensa ûn dente?
6.
E voiätre, ne-o baxäne
E ne-o dîne cäo mæ bæ,
V'azzardiesci de lasciäne
O segnale de dentæ
Intaggiôu ne-i nostri menti,
Se n'avesci quelli denti?
7.
Dîne ûn pö se se veddieiva
Vende a roba cosci cä,
Dime ûn pö se s'inricchieiva
Cosci fîto o bûttegä
In contanti e casamenti;
Se se foîse sensa denti?
8.
Prosperieivan tûtti i stati
Se no foîse pe-i mangioin;
No n'avieivan i avvocati
E profonde convinzioin
De colläse i povei clienti,
Se n'avessan quelli denti!
9.
Con ciû scrupolo a giûstizia
A saieiva amministrä,
No ghe saiva ciû malizia
In ti giûdiçi de fä
Scorta a-i laddri e a-i prepotenti,
Se n'avessan quelli denti!
10.
Con ciû fede e con ciû zëlo
I ministri do Segnô
Predichieivan o Vangelo
Perchè fessan tra de lö
Un partio tûtti i viventi,
Se n'avessan quelli denti!