Lunaio Regiña 1889/Tûtto quello chi lûxe o no n'é öu
| ←I Guanti | Lunaio zeneize compilao da-o sciô Regiña & C. pe l'anno 1889 Tûtto quello chi lûxe o no n'é öu |
No se vive che ûnn-a votta!→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Se pe tûtti i viventi lûxe o sô,
Perchè miggiæa de pövei mêuan de stenti,
De freìdo, de malanno, de brûxô,
De späximo de chêu, de famme a-i denti?
Se calcolemmo o ciæo comme ûn tezöu,
Tûtto quello chi lûxe o no n'é öu.
2.
Gh'é quella scignorinn-a tûtta trilli,
Tûtta trenn-e, tacchetti e cappellin,
E tûtta placche, braççaletti e spilli,
E càrega d'anelli e de pendin,
Che ghe veddei mangiâ stronsci de cöu?
Tûtto quello chi lûxe o no n'é öu.
3.
Veddei ûn fanfaron chi fa da grande?
Che ciù carte geografiche ghe vêu
Pe giä de stradda, e pe schivä e lûcande,
E tûtti quelli che pagâ a no pêu?
Dï, sensa puïa de fâve mette a-o löu,
Tûtto quello chi lûxe o no n'é öu.
4.
Gh'é quello professô chi sá de tûtto,
Ma o no sá ninte sensa libbro in man?
Chi no conosce o fïgo pissalûtto
Da-o giäno e rûzzenente pei pascian?
Che da-a beccassa o no distingue o cröu?
Tûtto quello chi lûxe o no n'é öu.
5.
Gh'é quello scribaccin da lite pærse,
Sponzia da licoristi e vinaççê
Chi porta tûtto l'anno e scarpe inværse?
Che, mentre i clienti crïan vendetta a-o çê,
O vanta giorno e nêutte o sò decöu?
Tûtto quello chi lûxe o no n'é öu.
6.
Gh'é quell'ätra chi và continuamente
Vestïa de lûtto a-a caccia do mincion
Che, creddendola vidua e possidente,
O s'invexenda de piggiâ o laccion
Mentre tra e sinse a g'ha ciù d'ûn resciöu?
Tûtto quello chi lûxe o no n'é öu.
7.
Gh'é quello chi se fretta co-a moggê
De questo e quello, e ciù legnæ pe-a testa
O piggia e di cassotti in to panê;
E comme i galli poi alzando a cresta
Pä ch'o digghe: Veddeì? son ûn bon töu!...
Tûtto quello chi lûxe o no n'é öu.
8.
Gh'é quello che con gran ciarlattanäia
Çitando mille passi di scrittoî,
E sensa manco intende cös'o bäia
O-o collocan tra i celebri oratoî,
Ben ch'o l'é ciù balordo che ûn Xidöu?
Tûtto quello chi lûxe o no n'é öu.