Lunaio Regiña 1889/I Guanti
| ←Chen e Gatti | Lunaio zeneize compilao da-o sciô Regiña & C. pe l'anno 1889 I Guanti |
Tûtto quello chi lûxe o no n'é öu→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
cansonetta
Bællo vedde sotto i guanti
L'attrattiva di braççin
Pin de fêugo, provocanti,
Grasci, riondi, alabastrin!
Bællo strenze e poi baxâ
A magninn-a delicâ!
2.
No se trêuva de segûo
Peì de märtoa e d'astracan
No gh'é sæa, no gh'é vellûo
Chi scompasse quella man
Che tramëzo a-i guanti fin
A l'ha l'ûmio d'ûn ciûmmin.
3.
Tante bælle scignorinn-e
De vistöza condizion
Con i guanti pän ciù finn-e,
Han ciú sfarzo e ciú illûxion:
E i scignori con i guanti
Pän ciú ricchi e ciú eleganti.
4.
In ti gren riçevimenti,
In ti balli, in ti disnæ
Ve fan mille complimenti
Quande seì tûtt'inguantæ:
Sentî l'ûmio e o fæ sentî
E ciù cöse descrovî.
5.
In to mettili e leväli
V'accorzeì chi l'é aggaibôu,
V'accorzieì chi sà portäli,
Chi se trêuva invexendôu:
E mandæ scinn-a o guantê,
Chi l'ha fæti, a-i sette çê.
6.
Ma gh'é o guanto chi despiäxe
A-o falampi, a-o fanfaron
Ch'o barbotta, o tremma, o täxe,
Ch'o l'ha o cô comme ûn limon,
Che s'o poëse o s'ascondiæ
Se pe sfidda ghe-o cacciæ.
7.
Da-e donnette ciú galanti,
Da-e personn-e d'äto cô
Se no seì parlâ co-i guanti
N'ottegnî nisciûn favô.
Nè amicizia conservieì
Se co-i guanti no-a tocchieì.