Lunaio Regiña 1889/L'addesciâse grand'ommo
| ←O Ciarlatan | Lunaio zeneize compilao da-o sciô Regiña & C. pe l'anno 1889 L'addesciâse grand'ommo |
Chen e Gatti→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
cansonetta
Comme ûn mostro de brûttessa
A-a vigilia de spozâ
Un angelica bellessa,
In ta pelle o no pêu stâ;
E ghe batte forte o chêu
Sotto a crosta di lensêu:
2.
Comme ûn chi ha guadagnôu
Un quaterno a-o semmenaio,
E da miscio, da despiôu
O diventa proprietaio;
E o se sforza inûtilmente
A parlave civilmente:
3.
Coscì ûn aze travestio,
Chi sa appenn-a l'abecê,
Pe l'intrïgo de partïo
O s'addescia conseggê
D'ûn Comûne o ciú importante,
E ghe pâ zà d'ëse Dante.
4.
Spesso, spesso o và a spëgiäse
Pe poei vedde cös'o pâ,
O no fâ che accomodáse
O vestî comme o parlâ;
E o l'interroga, o l'appunta
Che ghe pá zà d'ëse in Giunta.
5.
Nell'andâ, continuamente
O se vorta zà inderrê
Pe aggueitâ se gh'é de gente
Lì affermæ pe ammiälo lê;
E, da-o fä ciú d'ûn salûo
A-i moscin, o dà zú o sûo.
6.
Sciû pe-a scä do Municipio
O l'ammïa se i servitoî
Van a däghe ûn bon prinçipio,
Van a rendighe i önoî;
O moggogna, o scracca, o tosce
Pe-o salûo, ma chi o conosce?
7.
Quande gh'é primma sedûta
Ne-o Conseggio Comunale,
Lê, con faccia affûta, affûta
E pe-e moen ciú d'ûn giornale
E i discorsci preparæ
(Che se sà ch'o l'ha copiæ).
8.
O fà mille interpellanze,
O fà mille revixioîn,
Mille appunti in scë finanze,
Un pestaçço de mozioîn,
Mille ordini do giorno
Che fan rïe chi o l'ha d'intorno.
9.
E sciccomme pe-i giornali
Se ne parla all'indoman
Di só gösci colossali,
Do só bosco do baccan,
Questo pöveo galantommo
O s'addescia zà grand'ommo.
10.
E con l'äia e con l'andata
D'ûnn-a gran celebritæ
O l'aspëta a scappellata
Di só bravi amministræ;
E o stà drito comme ûn pälo
Mentre van a sûpplicälo.
11.
Vagghe all'äia e scazze tûtto
O Conseggio Comûnale,
Ma tra e lagrime, tra o lûtto
O só nomme o sä immortale,
E l'impronta ben marcâ
De scarbasse o ghe lasciâ.