Lunaio Regiña 1889/Chen e Gatti
| ←L'addesciâse grand'ommo | Lunaio zeneize compilao da-o sciô Regiña & C. pe l'anno 1889 Chen e Gatti |
I Guanti→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
cansonetta
Se veddei maio e moggê
Che se fan mille fraschette,
Che se dixan parollette
Con o sûccao e l'amê;
Ne-o parlâ comme ne-i atti
Da lì a ûn pö son chen e gatti.
2.
I parenti ciú accostæ,
Fradellin o benestanti,
Tanto instruïi comme ignoranti,
D'ogni sæsso e d'ogni etæ,
Ne-i commerci e ne-i contratti
Tra de lö son chen e gatti.
3.
Mentre ligan e nazioîn
Con de frivole alleanze,
Mentre dan mille speranze
De no fonde ciú cannoîn,
De tegnî pochi sordatti:
Re con re, son chen e gatti.
4.
Mentre son comme o mainâ
Che ne-i tempi borrascözi
Con di sforzi coraggiözi
O dirizze a barca in mâ,
I ministri attivi o ciatti
Tra de lö son chen e gatti.
5.
Quelli tali ch'eì mandôu
Con o vöto in Parlamento
E piggiävan o zûamento
De fä solo o depûtôu;
Tanto i brûn comme i scarlatti
Tra de lö son chen e gatti.
6.
Mentre parlan do Segnô,
Mentre sbraggian sofferenza,
Umiltæ, caitæ, pazienza,
Mentre predican l'amô,
Anche i prævi, anche i fratti
Tra de lö son chen e gatti.
7.
Se gran tempo pratichæ
I ciú cädi liberali
Mentre sbraggian pe-i giornali
Fradellanza e libertæ,
E se fan zûamenti e patti,
Tra de lö son chen e gatti.
8.
Tanti meistri e professoî
Che ne-a schêua, che ne-o collegio
Ve parrian exempio e spëgio
D'amorozi edûcatoî
Di stûdenti sävi ó matti:
Tra de lö son chen e gatti.
9.
Se fan guæra tra scienziæ,
Tra procûei, tra avvocati,
Tra poëti e letterati,
Tra scûltoî e pittoî stimmæ:
Scinn-a i storici ciú ezatti
Tra de lö son chen e gatti.
10.
Se fan guæra inveninâ
Tra i ciú bravi mûxicisti,
Tra comparse, tra coristi,
E s'andemmo a scandaggiâ
O Tamagno, a Borghi, a Patti,
Tra de lö son chen e gatti.
11.
Tra sensæ, tra mediatoî,
Tra indûstriali e tra indûstrianti,
Tra camalli e tra mercanti,
Tra azionisti e tra armatoî,
Pe-e tariffe ó pe-i caratti
Son delungo chen e gatti.
12.
No gh'é sbïri e segondin,
Lûstrascarpe, beccamorti,
Frôuxadoî, laddri di porti,
Lävapiäti, nè spassin,
Scciävi gianchi, nè mulatti,
Che no seggian chen e gatti.