Lunaio Regiña 1885/O Perdon
| ←Ognûn aggiûtta quelli do sò partïo | Lunaio zeneize compilao da-o sciô Regiña & C. pe l'anno 1885 de O Perdon |
A Galleria Mazzin→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
O PERDON
Quando ä mattin dä parte de levante
Spunta dai monti o primmo arbô do giorno,
E se veddan vegnî da-o mâ distante
E barche di pescoeì che fan ritorno,
E se comensa a descrovî a rivëa
Da-o schêuggio de Gabaia a-o cäo de Meie,
E o golfo liscio comme ûnn-a peschëa
O comparìsce popolôu de veie,
Mi piggio a porta pe tornâ a-o travaggio;
Ma primma, zà, passiö a piggiâ o perdon
Da quella figgia che a me dà coraggio,
E ch’a m’aspëta d’avansâ a-o barcon.
Lê quando passo a me salûa chinando
O so testin ciù bællo che ûnn-a stella;
Mì passo avanti, ma da quando a quando
Me vorto ä ammiâ co chêu chi me martella.
Pe quello giorno lascio dîme apprêuvo,
No vaggo in bestia e laûo a ciû no posso,
Ma se pe cäxo passo e no ghe a trêuvo,
Per dïe da man, me sento o diao addosso.