In occasione del terzo anno secolare/L’Apparizione di Maria Santissima
| ←torna a l'endexo | In occasione del terzo anno secolare dell'apparizione di N. S. di Misericordia in Savona de |
Traduzione dell Ave Maris Stella→ |
L’Apparizione di Maria Santissima
nella Valle di S. Bernardo vicina a Savona.
Catena Sacra col cenno di varj miracoli.
Senza remiscïon l'ultimo scrollo
Piggiò ò Demonio ne l'orrenda grotta,
Quando apparve a Madonna a ò Beato Botta
Per tiâne tutti fœua dò rompicollo;
Che i nostri Vegi con a corda a ò collo
In penitenza, e i Prævi in Stola e Cotta
In sciù pe ò Rian, che in zù da Valle ò trotta,
Andòn descâsi in forma de babollo;
Là, in curto dî, corrì tutto Savonna,
Sentïo da ò bon Vegetto ò Santo avviso
Da Venerabiliscima Matronna;
E ognun d’un santo ardô spirando in viso,
Baxiava ò Sascio onde pösò in Personna
A Reginna dò Santo Paradiso.
A Reginna do Santo Paradiso
Trattegnindo de Dio l’impeto e a raggia
L’ha fæto deventâ fœugo de paggia,
Tutta per noì misericordia in Viso,
E di castighi ò turbine improvviso,
Chi era per gragnoane unna metraggia,
N’ha cangiôu per reværso da medaggia
In un fiumme de grazie ò ciù deciso.
La alzò Savonna un Tempio a a gran Signora
Da sò doppia comparsa a ônô e memoria[1]
Donde ò Mondo pedonna da tutt’ora,
E ognun fede pœu fâ ciù che l’istoria
De grazie onde a n’infiamma e a n’innamora,
Vera capâra de l’etærna gloria.
Vera capâra de l’etærna gloria
Fù a Nave che treì giorni a sté sciù Sanna
Combattüa da Lebeccio e Tramontanna
Senza poreì di venti aveì vittoria;
Quando a un splendô d’in Çê (dixe l’istoria)
Sunò per l’aja a quelli da Tartanna
Voxe ciæa chi ghe disse - a Sanna a Sanna -
Tramandandone a noì grata a memoria.
Mancava a questa, comme tutti san,
E a i sò contorni per impise ò sacco
O tanto caro neccessario pan,
Quando ecco in porto intra ò Padron (per bacco)
Con richiscimo carrego de Gran
Dando a Madonna a-o diavo un’atro sciacco.
Dando a Madonna a ò Diavo un’atro sciacco
Cangiò Savonna ò tribolâ in cöcagna,
Quando Enrico Secondo a ò Ræ de Spagna
Minacciava cò ò Tûrco orrendo Sacco.
Dragut-Rais per dâ a i Spagnoilo ò scacco
Intrôu con çento Veje in ta campagna
Che Porto e Spiaggia in Voæ circonda e bagna,
Paiva ò voesse a Savonna dâ l’attacco:
Allora i Savoneixi intimorii
Fen preghera a Maria sci fervorosa,
Che a ò Sô de l’undoman fun esaudii;
Che de Dragut a Squaddra spaventosa
Partì à Çittæ saluando a çento tii,
Miracolo da Vergine Amorosa.
Miracolo da Vergine amorosa
Fù, da descrive in quelle etærne Carte,
Quando tutto d’Italia in ogni parte
A pæste a fava strage strepitosa,
Che con opea Divinna portentosa
De quella man che grazie ne comparte,
Tegnì Savonna allòa comme in disparte
Salva da quella strage rovinosa.
De quella grazia immacolata e püa
Che da a pæste do Diao ne mondâ e lava
Fæne sempre, Maria, bonna mezüa;
E d’esto mostro a velenosa biava
Fæne sparî comme fa ò vento, a püa
Dò vostro solo respirà a unna bava.
Do vostro solo respirâ a unna bava
Povera Contadinna in Lavagnœa[2]
Dé a a luxe unna belliscima figgiœua,
Ma sciuta senza læte a se trovava,
Quando dò Sœuxio, in grazia vostra, a Crava
Do sò tettin gh’impì a panzetta vœua,
Che a ò bûttava delongo in ta fascœua,
Perchè a n’aveiva troppo e ò gh’avvanzava:
E se a l’era con i atre in ta pastüa,
Per dexe meixi a viddan galoppâ
A fâ da Mamma a a povera creatüa;
Intanto a brava Donna consolâ
O quaddro a l’appendè da sò aventüa,
Vergine de Savonna , a ò vostro Altâ.
Vergine de Savonna a ò vostro Altâ,
Se me salvæ, prometto de vegnî,
Dixeiva un Raguseo che d’ægua impî
Se vedeiva a sò nave in âto mâ;
Quando a un træto a borrasca ecco cessâ,
Ogni peigo de morte scomparî,
Mentre finisce a Barca de scroscî,
Che ò rombo tappa e stiva un Pescio Spâ.
Intra ò Padron feliçemente in porto,
Compisce ò Voto dò so brutto caxio
Scampôu per Vostro subito conforto;
Coscì de Vostre grazie cò ò bambaxio
Tappæne i sensi in questo mondo storto,
Di Vostri Santi pê corrindo a ò baxio.
Di Vostri Santi pê corrindo a ò baxio
Quanti Orbi han mai per Voì aværto i œuggi,
Quante atre barche heì træto d’in ti schœuggi
O timon governandoghe e l’agiaxio....
Ma a numerâ chì tutti adaxio adaxio
De Vostre Maraveggie i pozzi e i trœuggi,
Da Religion e Palme e i Orofœuggi
No basto mì, che rispettoso i taxio;
Solo dirò, che stuppefæti e immoti
Do Mondo i Çittadin sempre fan ricca
A Vostra Casa de Tezori e Voti.
E mentre che coscì sempre ciù spicca
A Vostra âta bontæ, d’Inni devoti
De San Bernardo a Valle ancon repicca.
De San Bernardo a Valle ancon repicca
E di Vostri favôì parla ogni rocca,
Ma ò Rian d’Argento che pe i sasci ò ciocca
Criò ciù forte un tempo erzendo a micca[3].
Voì, che seì quell’Oliva coscì ricca,
Buttæmene, de grazia, zù unna brocca,
Che a porte a Sanna anchœu che a ò mondo fiocca
Guæra a ciù crûa che da per tutto a picca;
Ni in Lê, ni a Lê vixin, ni in schœuggio o in secca
Fæ che nisciunna Armâ ciante barracca,
E se a passasse a porte drita a stecca,
O in Voì ciù che Giuditta bælla e fiera
Troveà Savonna se qualchun l’attacca
Dò so divoto Popolo a a preghera.
Do sò divoto Popolo a a preghera
Savonna oltre i miracoli passæ,
Un n’otten da Maria de primma sfera
Sto terzo çentanâ da sò Pietæ;
Che mentre Zena orribile Collêra
Flagælla a tutto pôì de crudeltæ,
D’un sguardo sempre ciù pietosa in Cêra
Ne difende, e presærva a sò Çittæ;
D’inni e nœuve canzoin divota intanto,
Missi i divertimenti in fuga e a mutto,
Alza continuo affettuoso canto:
De so Immagini ai Pê canta pertutto,
Ah riçeveine sotta ò Vostro Manto
Vergine Voì che seì ò nostro aggiutto.
Vergine Voì che seì ò nostro aggiûtto,
Fæne ò bællo favô che stemmo in trappa,
Onde nò fâ mai-ciù nisciunna zappa,
A Voì pensando in tutto, e da per tutto:
Che do peccôu rompindo ò môuro brutto
In Dio restemmo forti ciù che in Tappa
Scangiando doppo in luminosa cappa
Questa ch’emmo tristiscima de lutto:
Ma se gh’œu penitenza (non gh’è racca)
Chi vœu scassâ da ò Libbro ò sò pascivo,
Oppù l’anima rende senza tacca;
Maria fæ che incomençe un conto attivo,
Perchè no sò quanti me n’hò in ta stacca
Mi che son ò ciù tristo e ò ciù cattivo.
Mi che son ò ciù tristo e ò ciù cattivo
Zà lì per l’atro Mondo in sciù e mosse
Dæme Madonna a ò cœu ciù forti e scosse,
Per fâ delungo a ò vizio un fœugo-vivo,
E se per grazia vostra ancon son vivo,
Primma che vagghe in pûa queste quattr’osse,
Dæme a manêa che ringraziâ ve posse
D’ogni visita vostra, e donativo....
Ma ò tempo ò me sparisce comme ò fumme
Che vaggo incontro a Morte in Bastardælla,
O comme in ta marinna côre un fiumme,
Ah mentre n’ho ni torna ni fraxælla
Co ò vostro Divin raggio fæme lumme,
Vergine Voì che seì a nostra Stella.
Vergine Voì che sei a nostra Stella
Scichè andâ senza Voì nisciun s’incalla,
Onde Iddio passaporti ò ne regalla
E Angei Custodi in færma sentinella,
Tutti vunti d’arômi, e de canella
Guiddæne a göde d’ogni vostra galla
Che con nœuvi instrumenti adorna a spalla
V’onoreremmo Meistri de Capella:
Coi Sætte Passaggê da mæ barchetta[4]
Con tutte e sò famiggie a ò Vostro Rollo
Scriveine oh Moære cara benedetta.
Per fâne poi da i Angêetti in collo
Piggiâ quell’ôa che ne darà Cichetta
Senza remiscïon l’ultimo scrollo.