Esopo Zeneize 1822/L'Erboo d'Amandoa, e l'Erboo de Figo
| ←O Lô, e a Grûa | Esopo Zeneize de L'Erboo d'Amandoa, e l'Erboo de Figo |
I Chen piccin, e o Lô piccin→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
L'Erboo d’Amandoa, e l'Erboo de Figo.
A-o spuntâ da Primmaveîa,[1]
Unn’Amandoa in t’un giardin
A l'ea tutta bella sciuîa,[2]
Gianca comme un armellin;
Con superbia a se vantava,
Mincionando un Briggiasotto,
Perchè nûo do tutto, appen-na
O cacciava qualche brotto;
Ma un-na nêutte fesse un freido
Così[3] forte, che giassò,
E all’Amandoa tutte a reo
E so sciuette ghe crovò.
Passò a Stæ, vegnì l’Autûnno,
Bello vedde o Briggiasotto
Pin de fighe lagrimose
Co-a camixa, e o collo rotto,
Chi se vorta ä so vexin-na,
E ghe dixe con raxon:
Dove son tutte e to scioette,
E to amandoe dove son?
Ah! per bacco! che a to gloria
Presto in fûmme a se n’andò,
Ti n’æ manco ciù de fêuggie,
Vegni chì, che te croviò.
Non se deve mai vantâ
D’ese ricco e ben vestïo,
Nè chi è poveo mincionnâ,
Perchè tutto ven da Dio,
Un chi è ricco anchêu, doman
O porrieiva porze a man.