Esopo Zeneize 1822/I Chen piccin, e o Lô piccin

by Martin Piaggio

←L'Erboo d'Amandoa, e l'Erboo de Figo

Esopo Zeneize de Martin Piaggio I Chen piccin, e o Lô piccin

O Moscon→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XXI.

I Chen piccin, e o Lô piccin.

Trovò a caxo un bon Pastô
In t’un bosco un Lô piccin,
Che piggiandolo in errô
Pe' un cagnetto pommelin,
Presto a casa o se o portò,
E con di atri o l’allevò;

Finchè o fù piccininetto
O l’ea paxe comme un bæ,
Poi vegnindo un pö grandetto
O schissava de dentæ,
O batteiva tutti i chen
Senza poêine fâ de ben;

Laddro, e ingordo o se scroviva
Tutti i giorni d’ese un Lô,
Sempre ciù o l’inferoçiva;
Se n’accorse o bon Pastô,
D’arescoso o l’ammassò,
E in t’un fosso ö sotterrò;

Ma o crediesci!... quelli chen,
Che doveivan custodî
A so casa, e fâ i guardien
De so pegoe, e fessan moî,
Allevæ con quello Lô,
Favan tutti o bell’umô;

Diventon treitoî, mastin,
Addentavan so patron,
Pin d’astûzie e de morbin
Voeivan fâ sempre o potron,
Nè co-a famme, e co-e bacchæ
No se son mai ciù emendæ

Chi và con di compagni
Cattivi, e mâ inclinæ,
De savio, e de bon indole
O ven cattivo assæ.