Esopo Zeneize 1822/A Sigaa, e o Grillo
| ←A Çerva, e a Vigna | Esopo Zeneize de A Sigaa, e o Grillo |
O Lô, e o Bæ→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
A Sigaa, e o Grillo.
L’ea do meise là de Stæ,
Quando o Sô co-e rêue affoghæ,
E brûxando ciù un tisson,
O va a villezà[sic] da-o Leon,
Che un-na sciolla de Sigaa
A cantò senza grattaa
Tutto o giorno con frûsciâ
Co a sò voxe destonnâ
Tanti Insætti sò vexin,
Finalmente a desse fin
A so mûxica arraggiâ
Quando o Sô se cacciò in mâ:
Sciortì alloa dä sò tannetta
Un Grilletto, e o prinçipiò
A cantâ a sò cansonetta
Comme a moddo de Rondò,
O no-a voeiva ciù finî;
A Sigaa, chi aveiva vê[u]ggia,
(Perchè stanca) de dormî,
A s’avansa da un-na fêuggia,
E a ghe dixe in ton ardio:
E così! ti æ ancon finîo,
Brutto insætto, de cantâ?
Chi nisciun pêu ciù quetâ!
Se ti avessi comme a mæ
Un-na voxe bella assæ,
Te soffrieivo, ma in sentî
Sempre fâ grigrî grigrî
Tanta raggia ti me metti,
Che te faivo[1] in menissetti,
Taxi dunque, e n’insordî
Chi hà besêugno de dormî.
Ghe rispose o Grillo, caa,
Per caitæ, no t’arraggiâ,
Mi no sò se o mæ cantâ
O l’arrive a-o tò, Sigaa,
Ma pe o gusto e l’armonîa
A l’è a stessa sinfonîa;
Tutto o giorno ti æ cantôu
Senza mai piggiâ respîo,
Che ti m’æ quæxi insordîo,
T’hò sofferto, e n’hò parlôu,
Se aoa canto un pittin mì,
Taxi dunque, e soffri tì.
A-o mondo quanta gente
Pretende impunemente
O Prossimo seccâ
Co-i fæti, e cö parlâ,
E lô no vêuan soffrî
Nisciun nè fâ, nè dî!
- ↑ fæivo