Esopo Zeneize 1822/A Figgia, e l'Erba sensitiva
| ←A Sigaa, e a Formigoa | Esopo Zeneize de A Figgia, e l'Erba sensitiva |
O Lô, e a Grûa→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
A Figgia, e l'Erba sensitiva.
Un-na Figgia zà grandetta,
Bella, savia, ma un pö viva,
A l'andò in t’un-na villetta
Dove gh’ea da Sensitiva,
Un-na fêuggia a ghe toccò,
Quella presto a se retiò;
A restò mortificâ,
Che ghe paiva,[1] e con raxon,
De n’aveighe fæto mâ,
A cianzeiva da-o magon;
Primma i êuggi a se sciûgò,
Poi così[2] a l’interrogò:
E per cose, bell’Erbetta,
Ti è[3] con mi così[4] arraggiâ?
De toccâte un-na fêuggietta
No t’hò miga fæto mâ?
No son miga velenosa,
Che ti fæ così[5] a ritrosa?
Ghe rispose a Sensitiva:
Bella Figgia, o l’è o mæ fâ
De retiâme, e de paêi viva
Se me sento un pö toccâ,
Me pâ d’ëse ciù segûa,
O l’è instinto de natûa;
Per to ben, forse, che anchêu
Sta domanda ti m’æ fæto,
Se ti è[6] savia, aggila in coêu
Co-a risposta, che t’hò dæto,
Perchè a pêu vegnîte a taggio,
No stâ a cianze... addio... bon viaggio.