Chittarin zeneize 1881/453 Sunetto

by Martin Piaggio

←Sunetto

Chittarin zeneize de Martin Piaggio Sunetto - a-o pitô Fraschê

Brindixi→

pe 'n quaddro da Pietæ esposto a l'Academmia de Belle Arte do 1840

SÛNETTO ¹

Chi o l'é che, sensa cianze, vedde pêu
Questo parlante quaddro da Pietæ?..
Ah! che besêugna aveì de marmo o chêu,
Ëse zazzuin do Bello, o in cecitæ.

Con ciù anima, esprescion, grazia e veitæ
Esprimme da Gran Maddre o dô se pêu?
Ne-o figgio esangue gh’é a divinitæ,
Son vive e carni, vëo quello lensêu.

Lode per sempre a-o magico pennello
Do nostro sciô Fraschê, pin d’armonia,
Da baxâlo e levâseghe o cappello.

Ûnn’opera guidesca ², ben finïa
Da servî pe accademico modello,
E figùrâ in qualunque galleria.