Chittarin zeneize 1881/43

by Martin Piaggio

←Sunetto

Chittarin zeneize de Martin Piaggio Sunetto - Risposta a-o sciô Françesco Rolla

Sunetto→

Risposta pe-e rimme a 'n atro sunetto do Françesco Rolla. Se prezumme che manco sto sunetto chie o segge conservao tra-e carte do Piaggio, che sedonque o Zane Menuo, o l'aviæ dovuo stampâghe da-a rente sto chì ascîe.

SÛNETTO ¹

Me voeì fâ troppo insûperbî, Checchin,
Con dâme nêuve marche de bontæ;
Mi che son sccetto, e me piaxe a veitæ,
Me pä che attacchæ a-o gatto o sûnaggin ².

Se foîse comme voî de tavolin,
Vorrieivo fâ restâ tûtti imbägiæ,³
Ma son ûn ommo lì comme se dæ,⁴
Fasso quello che posso da Martin.

Poco e ninte vä a mæ poetica limma;
Quando scrivo di versci e de farsette
Procûo de n’ëse mai scciavo da rimma;

Parlo senz’R ⁴ comme fa e donnette,
Troppo valûto di mæ amixi a stimma,
E ciù voî, che Martin fra i primmi o mette.