Chittarin zeneize 1881/373 Sghiribiçço

by Martin Piaggio

←Brindixi

Chittarin zeneize de Martin Piaggio Sghiribiçço

Sunetto→

SGHIRIBISSO ¹

O mondo da giornâ
Fæto ä reversa o se pêu ben ciammâ,
Perchè ogni pö se vedde,
In tûtto e da per tûtto.
De cöse stravaganti da no credde.

Se dixe bello a-o brûtto,
A-o rosso verde, a-o gianco cô ² d’inciostro,
E a-o vostro se ghe dixe sempre nostro.

Chi perde guägna a-e liti comme a-i zêughi,
E l'é presto decisa ogni question,
Ché chi sbraggia ciù forte ha ciù raxon.

Ûnn-a votta da-i chêughi
I tötani in ta poëla se frizzeiva,
Aoa o tötano incangio frizze i chêughi.

A veitæ con sccettessa se dixeiva,
Aoa böxie vellæ,
E per baxi se ciocca de maschæ.

Regnava a bonn-a fede co-a giûstizia,
Aoa inganno e malizia.
A modestia e a saviessa
Diventan vizii sensa a sfrontatessa.

O conjûgale amô co-a fedeltæ
Son derisi e fischiæ;
A vigilansa sorve i sò figgiêu
Son antigagge de^[sic] bandîse anchêu.

Tempo perso l’é a bonn-a edûcazion,
Beghin se dixe a chi ha da religion.

Chi va drïto va storto,
Sensa cabale e intrighi n’intræ in porto.
Oh tempi stravaganti e mascarsoin!
Che pe ëse bravi s’ha da ëse filloin!