Chittarin zeneize 1881/257 Strofoggio

by Martin Piaggio

←Scherço

Chittarin zeneize de Martin Piaggio Strofoggio

Ciaciarata→

Pranço do 18 frevâ 1840

STROFOGGIO ¹

Racconto do gran pasto che fè o Chêugo Carlin
Per consûmmâ o pûpillo do nostro goffettin,
Ne-a casa sorva a cava de prie do sciô Bonin.

In primis et ante omnia mancava a sei mëz’ôa,
   Ché (per disnâ ciû presto) se semmo missi a töa,
In nûmero de sezze, comme luvi ² affammæ,
   Bägiando tûtti a coro, co-i denti lunghi affiæ.
No conto o sciô Bonin, perchè poco o gh’é stæto,
   Zacché, doppo a menestra, a Murta o se n’é andæto,
Con despiaxei grandiscimo de tûtta a societæ
   Grata e riconoscente a-e gentilesse ûsæ,
De quæ parliö ciù a lungo in atra circostansa:
   Vegnimmo dunque a noi che ne boggiva a pansa.

Se piggiò posto abbrettio e, pe agûssâ ciù a famme,
   Se dé ûn assäto a-i ostreghe, oive, fighe e salamme.
Comparì due menestre. A primma de raviêu,
   L’ätra verde, con poisci, carotte, cöi, faxêu.
A-i primmi se dé sûbito ûn gûstoso abbordaggio
   (Replicôu da-i ciù lesti) ben boin, meno o formaggio.
Quanto ä menestra verde, ne-a sò semplicitæ,
   A paeiva ûn preboggion, e a no fù manco assæ.
Primma portâ: Buggïo de vitella e pollanche,
   A primma stupposiscima, e ätre dûe^[sic] non gianche.
Seconda: Due frïtûe de porsemmo e pescetti,
   C’ûn rondanin cö pìssigo, chi ne fé cazze i noetti.²
Stecchi de legno in mëzo a bughe de limon...
   Fermata de mëz’öa per poeì fâ a digestion.
Terza portâ: Duî piatti, (lavô particolâ
   Do chêugo) pê, figaeti e colli in fräcassâ!...
Quarta portâ (d’ûn piatto!) Ûn nasellin buggïo
   Chi nò bastò per quattro, freschiscimo e savoïo,
Con condimento pe ätro d’êujo non troppo fin,
   Per mancansa de peivee ghe sûpplì o rondanin.
Lûmmi, pe amô de Dio!... L’é scûo no se ghe vedde:
   Nisciûn trêuva ciù a bocca!... Sûbito... A n’è da credde:
Doppo mëz’öa d’aspëto, ûn lungagnon portò
   Due gren lûmmee sens’êujo... Presto ûnn-a a s’ammortò,
Restando mëzi a-o limbo, e soffochæ da-o fûmme
   Con l'odoretto amabile de moccatûa de lûmme.
Ûltima e quinta missâ^[sic]: Rosto de pollastrin,

   Funzi a funzetto crûi, non chêutti faxollin.
Dessert: Ûnn-a gran fetta d’ex-grivëa, con de peje,
   De l'ûga gianca e neigra, de verdi carle meje,
Rostïe (co-a scorsa) in giasso, et pe-i dilettanti
   E professoî nottûrni, torna ostreghe piccanti!....
Se pastezzò vin neigro e gianco bon nostrâ,
   Do pan fresco e pösôu; fù o vin particolâ
Barbera spûmosiscimo portôu da Gambarotta,
   Ma ciù d’ûnn-a bottiggia da töa a passò de sotta,
Che poi Bottâ con Botto, Cristoffa e o Marchexin
   Se i han sciûghæ in terrassa, sensa ciammâ Martin.
Fù assæ ben missa a töa, finiscima giancaja
   (Do sciò Bonin s’intende) con lûsso d’argentaja.
S’é stæti allegramente e in bonn-a compagnia,
   E tûtti bravamente se l’han, trincando, impïa.
Se contò de gren balle, s’è fæto di commenti
   Modestamente lûbrici, con satire innocenti.
Tanto forte se rieiva, se criava e discorriva
   Che paeivimo in Babele, nisciûn ciù se capiva.
Ghe fù ûnn-a gran minaccia, non zà de cazze prïe,
   Ma de sentî o Luccâsso improvvisâ poexie.
Se fè da Grosso ûn brindixi solo fra tanti mûtti
   C’ûn verso lungo ûn miggio, perchè o sentissan tûtti.
Doppo quattr’ôe, con stento, se semmo alsæ da töa,
   E, barcollando alquanto, s’andò zù dä scignöa,
A sempre compitisciina sciâ Camilletta Ratta,³
   Che, veddendône^[sic] in cymbalis, rieiva comme ûnn-a matta.

Lì se piggiò o caffè sensa rosolio, e questo
   Non per scordo economico, ma per finî ciù presto.
Per fâ ûn'improvvisata, ghe fù ûnn-a sûnatinn-a
   Fæta co-e gommie a-o piano da-o sò servo Reginn-a;
Poi ballo, sensa mûxica, de tûtti a ûso Furlann-a,
   Me porpezzava Figoli, con dîme mæ cillann-a,
Vëgni, pestûmmo cäo... e ciù ûn pittin con quelle
   Eterne sò zenoggie me rompe e tavernelle.
Gh’ëa da scciûppâ da-o rïe in veddine ballâ,
   Paeivimo Fauni, Satiri e matti da ligâ,
Dando pessæ, spuncioin, scorrindo comme i gatti
   Tûtte e Ratte da casa, che rieivan di nostri atti.
Mi poi vestïo da Lûcco con quello marscinon
   Che rebellavo in tæra, pe ûn mostro me piggiòn,⁴
E, se no scappo sûbito, me dan de spassojæ...
   S’andò a piggiâ do fresco pe-e mûagge a ûnz’ôe sûnn-æ,^[sic]
Con lampionetti ammorti, e poi se fé ritorno
   Con qualche aneddottin... che ve diö ûn atro giorno.