Chittarin zeneize 1881/261 Ciaciarata

by Martin Piaggio

←Strofoggio

Chittarin zeneize de Martin Piaggio Ciaciarata

Sunetto→

brindixi lezuo da l'aotô a-a fin do pranço do "strofoggio" precedente

CIACCIARATA ¹

Zacchè o pöveo carlevâ
Poco tempo o pêu campâ,
Ché o l’é tösto in angonia,
Per finîlo in allegria,
Doppo questa gran pappata,
Vêuggio fâ ûnn-a ciacciarata.

Sciscignori e, con licensa
Da mæ riverita ûdiensa,
Vêuggio lëze sta canson

Missa insemme de sprescion,
E per ordine alfabetico
Destegâ ûn evviva poetico
A-i colleghi tûtti quanti
Chi bibenti e manducanti,
Scacchezzanti, goffezzanti
E spranganti bûzzaraje
Ne-a ciù antiga de speziaje.

Favorïme in cortexia
De scilenzio e d’attenzion
Façendo eco ä mæ poexia
Con risponde all’occaxion
Tûtta in coro a comitiva,
E toccando o gotto: Evviva!
Presto impimmo o caliçetto,
Vaddo a bomba... me ghe metto.

Fasso o primmo, con piaxeì
E per atto de doveì,
A-o mæ antigo bravo amigo
Nostro sciô Bonin Gaitan,
Chi non ha nisciûn nemigo,
Perchè o l'é ciù bon che o pan.

O ringrazio a nomme mæ
E de tûtta a societæ

Da paziensa e da bontæ
In soffrî a seconda votta
Nell’ameno sò casin
Ûnn’armâ d’invexendoin
Che torniän a tersa votta,
Ghe o prometto da Martin;
Per capara, ansi ghe femmo
Ûn gran brindixi e sbraggemmo:
Viva sempre o sciô Bonin!

E gh’azzunze o Sciô Reginn-a:
Viva ascì a Casa Boninn-a,
Moggê, figge, nevi e nesse,
E pro-nevi (se o n’avesse),
Per mill'anni ancon, evviva
I Bonin co-i Ratti, evviva,
Con lê, tûtta a comitiva,
Sciù tocchemmo, allegri, evviva!

Fasso ûn brindixi a Bottâ,
Bravo amigo e bon figgiêu,
Servixoso, quando o pêu,
Trasportôu pe-o cantezzâ,
Correntiscimo goffista
E invincibile scacchista,
Meno quando o perde: Evviva
O sciô Luigi e a comitiva!

Fasso l'ätro, alsando o gotto,
A mæ nevo Aurelio Botto,
Garson pin d’attivitæ,
Brasso drïto da çittæ,
Impaziente goffezzante,
Do bon pitto dilettante,
Bravo mëgo in circostansa,
Inventô do corrodendo
Frugans, recipe stûpendo
Per fâ cresce i doî de pansa.
Bravo!... Evviva, sempre evviva
O sciô Botto e a comitiva!

Me ne lappo mëzo dïo
Per fâ ûn brindixi granïo
All'illustre, all'ornatiscimo
E mæ bon padron cariscimo
Casabonn-a Senatô,
Sempre amigo dell’amigo
E nemigo dell’intrigo.
Magistrato stimatiscimo,
Do quartê decoro e önô:
Viva o sciô Tognin, evviva,
Con lê tûtta a comitiva!

Fasso ûn brindixi savoïo
A-o distinto, all'erûdïo

Sardo professô Candeja,
E ghe prego ûn bon timon,
Perchè o scaffo o ghe l’ha bon
Da poeì fâ sûbito veja:
Che bon pro ghe fasse! Evviva
O sciô Luigi e a sò scignôa
Chi brillieiva a questa töa:
Viva l'ûn e l’ätra, evviva,
Con lö, tûtta a comitiva!

Passo ûn toast in versci sdruccioli
All’ercûleo, telegrafico
Nostro sciô Françesco Figoli,
Mæ patron riveritiscimo,
Goffezzante costantiscimo,
Zûgôu bravo e speditiscimo,
Chi risponde doppo ûn secolo
E o se e tïa da tûtte e bande
Con piaxeì e gûsto grande.
Che bon prò ghe fasse! evviva
O sciô Checco e a comitiva!

Fasso ûn brindixi gûstoso
A-o braviscimo, uffizioso
Commissâio graziosiscimo,
Vigilante, prûdentiscimo,
Chi conosce o sò mestê

E ben visto da-o quartê,
Reiso quieto e ordinatiscimo.
Viva o sciô Filippi, evviva,
Con lê, tûtta a comitiva!
Ghe i piggiemo a goffo, evviva!

Fasso ûn toast in ton patetico
E con metro disarmonico
A-o sciô Falco dolentiscimo
Pe-a gran pèrdia!... Ma tronchemmo
Sto sovvegno de desgûsto,
A-o quæ tûtti s’associemmo,
E ûn tribûto troppo giûsto
D’amicizia ghe paghemmo,
Criando con tristessa, evviva
Pippo Falco e a comitiva!

Ûn evviva vêuggio fâ
All’insigne professô
Gambarotta direttô
Salûtare dell’ûspiâ,
Zûgôu bravo, precisiscimo
Lesto, lindo e correntiscimo,
Che a sò speize o l’imparò,
Ma ciù votte o me e sciûgò.
Bon prò gh’agge fæto! Evviva
O sciô Zane e a comitiva!

Fasso ûn brindixi sûgoso
A-o mæ amigo e bon padron
Sciô Cristoffa ommo stûdioso
Chi fà onô ä sò profescion,
E o mettiö in cappo de lista
Di ciù bravi farmacista,
Poeta, istorico, botanico,
Consûltô e bravo magnifico,
Che, fra e tante abilitæ,
O possede o gran specifico
Per guarî da-o mâ de moæ ²
Ch’o dà gratis... Bravo! Evviva
O sciô Grasso e a comitiva!

Ûn evviva vêuggio fâ
A-o sciô Grosso mæ compâ,
Professô de qualitæ,
Faccendoso pe-a çittæ,
Chi se pêu ciammâ ûn tesöu
Pe-o quartê de San Teodöu,
Poeta bravo improvvisante
E famoso goffezzante,
Con bon punto campanante,
Chi se zêuga, a la minutta,
O sò resto, cioè mia mutta.
Viva monsù Grosso, evviva,
Con lê, tûtta a comitiva!

Fasso ûn gran toast all'eroica
Lazzù a quella faccia stoica
De Manfredi chi m’ammïa,
Garson franco de bon chêu,
Ben versôu ne-a farmacia,
Bravo in mûxica e poexia:
Canta comme i roscignêu,
Goffezzante fûrbo e fin,
L’addicciôu ³ do tavolin,
Scilenzioso e pin de flemma
Che, perdendo, mai giastemma,
Me n’appello ä comitiva...
Viva o sciô Lisciandro, evviva!
Che o ne fä sentî a sò piva.

L’ätro evviva o vêuggio fâ
Giûsto là a-o sciô Mongiardin,
Sempre allegro, êuggi de foin,
Famosiscimo corsâ
De fädette e meì pippin;
Capriçioso e bon zûgôu
Chi camminn-a spesso ä vista,
E o ritorna abbacciuccôu
Quando o se ne fa ûnn-a pista;⁴
Che bon prò ghe fasse! Evviva
Pasqualin e a comitiva!

Per no stâve ciù a frusciâ
Co-a tediosa mæ canson,
Mettiö i ätri in to cadeon
Che ben vêuggio nominâ.

Fasso dunque ûn brindixon
A-o sciô Marchexin galante,
Compitiscimo, elegante,
Da-e pupponn-e çercatiscimo
E zûgòu fortûnatiscimo;
A-o Sciô Maengo Salvatô,
Farmacista rinomôu,
Che ho avûo anchêu solo l’önô
De conosce e fortunôu
D’ëse o sò bon servitô;
A Palazzo bon zûgôu
E braviscimo cacciôu,
Chi no fa mai botte vêue
Co-i cûgianchi e e parissêue...
Viva o bello terno, evviva,
Con lö, tûtta a comitiva!

E, scibben che o n’é presente,
No me scordo o gran Lûccasso
E ûn gran brindixi ghe fasso
Tanto forte che o me sente;
Scacchezzante straordinäio

Chì se dà con tûtti a rëo,
Batte o cû ⁵ finn-a a l’Ebreo,
Numismatico, antiquäio
De moderne antighitæ
E de libbri nêuvi ûsæ,
Poeta c’ûn nêuvo rimäio.
Mi ghe prego sanitæ
Da no stâ ciù sedentäio
E che o caccie e scròssue via
Per vegnî co-a compagnia,
Ma che o crêuve o tafanäio...
Viva o sciô Falcon, evviva,
Con lê, tûtta a comitiva!

Chi finiscio a cansonetta
Ché n’ho tosto ciù de sciôu ⁶,
Se a l'é stæta ûn pö lunghetta,
Perdonæ se v’ho seccôu,
E, se v’ê avansôu do vin,
Fæ ûn pö ûn brindixi a Martin.