Cava in to remoin 1930/Ö SÔLLEON
| ←Seia de Zenâ | In to remoin de Ö sôlleon |
O zeûgo do sciû e zû→ |
Ö SÔLLEON
Da ogni parte no se sente
che 'na sola esclamazion
«Ah, che cädo prepotente,
che tremendo sôlleon!».
Sia de nêutte che de giorno
se pâ d'ëse drento ûn forno,
e se ancon o continuiä
de segûo se deslenguiä!».[1]
Tûtte e gente pân fontann-e
ambolanti pe-a çittae;
da-a gran cheita de cingiann-e[2]
tûtte e stradde son bagnae.
No gh'é bava d'arbaxïa,[3]
dö vapore se respïa;
manco a bagno drento a-o mâ
se pêu ö cädo, sopportâ.
Anche a gente che in campagna
ciû che in sprescia son scappae,
non han trovôu quella cûcagna
che s'ëan tanto figûrae,
e de sotta a-e verde ramme
ghe pâ d'ëse in mezo a-e sciamme;
con ciû mosche a tûtto andâ
e di odôi da... fâ bêuttâ.[4]
Mî, in compenso, me cönsolo
a passame ö scadenzê
e cian cian me trêuvo a-o Polo
cö Gran Pack de sotto a-i pë,
pin de brividi glaciali
a-o pensiero de cambiali
che tra giorni ho da pagâ,
con 'sti incasci da giornâ.
Poi me lezo i avvisetti
che me manda l'Esattô,
quarche riga di precetti
d'ûn birbante creditô,
e se cëppo ancon me sento[5]
fasso ûn âtro esperimento:
penso a-o fitto in arretrôu
e divento congelôu.