Cava in to remoin 1930/Ö PESCOU DA CANNA

by Gioxeppe Cava

←Barchezzata a-o ciaeo de Lûnn-a

In to remoin de Gioxeppe Cava Ö pescou da canna

A dattilografa→

Ö PESCOU DA CANNA

I.

Son ö pescöu da canna,
da lensa, da pörpëa^[1]
e passo con paziensa
ö giorno in sce a schêuggèa.^[2]
Co-a moula e cö formaggio!^[3]
ancioa e sardenetta^[4]
so fate ûn boccònetto^[5]
da fâ vegnî l'aeguetta;
ma förse perchè i pesci
in böcca l'aegua han zà,
se callo a lensa a bagno^[6]
nisciûn o me ghe dà.

Ö tempo passa e ö lammo^[7]

o pende in fondo a-o mâ
e se s'ostinn-a ö pescio,

mi ascì me sò ostinâ.

II

Con l'êuggio in sce o nattello,
a mae pippetta in bocca,
aspëto, aspëto... aspëto
se me ghe dan 'na tocca.^[8]
A lensa l'é ben teisa,
sardo ö çimello in man,^[9]
gh'ho ûn brocco che co-i denti^[10]
n'ou taggia ûn pesciocan;
ma ö pescio anchêu l'é aspaerto,^[11]
sà fâla da fillön,^[12]
sensa mesciâ ö nattello
se porta via ö boccôn.

L'é mezogiörno, a pansa

comensa a mögögnâ;^[13]
no vêuggio dâme vinto,

ûn pescio ho da piggiâ.

III.

Quando comensa a seia
se pesca con vantaggio,
e mi, pensando a-a çenn-a,
redduggio de cöraggio.
Prûmezzo e cö vermello^[14]
ö lammo inlesco ben,
caccio zû a lensa e aspëto
ö pescio che no ven...
Ma no, miae là ö nattello
han faeto subaccâ...
Tïo sciû con sprescia, e a lensa...
se streppa... e filla in mâ!

Ormai, son messe dite,

costemose a-a çittae,
cattiö due boghe frite

da ûnn'oste in ti Casciae!

1. Pörpëa: lenza per i polipi.
2. Schêuggèa: scogliera.
3. Moula: midolla.
4. Ancioa: acciuga.
5. Bocconetto: bocconcino, qui sta per esca.
6. Callo: scendo, qui sta per getto in mare.
7. Lammo: amo.
8. Tocca: addenta l'esca.
9. Çimello: canna flessibile e forte adatta per la pesca
10. Brocco: filo di seta incolore, parte terminale della lenza.
11. Aspaerto: furbo, sveglio.
12. Fillön: filone.
13. Mögögnâ: borbottare.
14. Prûmezzo: minuzzoli di esca che si sparge in mare per richiamare i pesci; in genovese: brûmezzo.