Bolle de savon/O quadretto do giorno
| ←Pe-o monumento a Mameli | Bolle de savon de O quadretto do giorno |
Comensando l'anno→ |
| www.liberliber.it 2011 |
Dipinzo zù d'asbrïo, dipinzo a sguasso
comme ven ven, c'ûnn-a gran pennellâ,
dipinzo insomma co-a spassoïa, spegasso...
digghe chi vêu che no me l'ho pe-a mâ:
ûn paisaggio d'inverno; freido e giasso:
a gaverna, i candiôti; o sciûmme, o riâ
mettan freido d'ammiâli; o çê o l'é basso,
e l'é lì lì pe mettise a nevâ.
Ghe vêu dell'ätro? - Angiëti co-e trombette,
o pan de bosco, e pe compî a pittûa
a cabanna, i remaggi, e paisanette;
costiggiêu, bricchi, monti, e boschi e case,
e in primma riga, a fâ bella figûa,
comme sempre, due bestie: - o beû con l'aze....