Bolle de savon/Comensando l'anno
| ←O quadretto do giorno | Bolle de savon de Comensando l'anno |
In memoja de Luigi Montaldo→ |
| www.liberliber.it 2011 |
Chi ben comensa - diva ûn giorno quello
o l'é quaexi ä meitae do sò cammin;
chi o cavo sà trovâ do rûmescello
desghêugge poi l'assetta scinn-a ä fin.
Tûtto stà a no sbagliâ o primmo pomello;
e o giorno o se conosce dä mattin:
a vitta a l'é comme ûn indovinello:
l'é bella a teja se l'é bello o lin.
Da tûtto questo vegno ä conclûxion:
comensando ben l'anno, i ätri trexento
sciûcianteçinque giorni gh'é raxon
da sperâ de tegnise sempre a vento,
e che in sciö teito no ghe dagghe o tron:
passe ûn sûnetto... ma de semm'in çento!