Bolle de savon de Carlo Malinverni
A-o Poeta Zeneize
[p. 181 modifica]
A-o Poeta Zeneize
(Pe l'inaugûrazion do bûsto a Nicolla Baçigalô)


A mûza portoliann-a,
vestïa dä festa, missa in punto d'ôa,
d'in çimma a ûnn-a fontana-a
a me ciamma, a m'invita, a me scigôa;
a me dixe: ti ascì porta ûnn-a sciô
a questo marmo do Baçigalô:

che o continuava a bella tradizion
zeneize do Foggetta,
do Çighaea, do Cavalli, do d'Arton,
de Todaro Conchetta,
do Spinoa, do De Franchi, de Martin;
pe-i quae se pêu ben dî: - pochi ma boîn. -

O cäo sciô Niccolin,
no l'é a mì che portâ ûnn-a sciô me tocca,
ma a-i tò conçittadin
tûtti quanti, che ûn giorno dä tò bocca
han sentïo quelle tò rimme savoïe
che i favan quaexi desgösciâ da-o rïe.

[p. 182 modifica]

In te solennitae
quande se stava a töa cö gotto in man,
o sciortindo da-e porte da çittae
s'andava a-o Garbo, a-o Monte, a san Çeprian,
o vëo zeneize o voeìva a to poexia
pe poi lëzila in mëzo ä compagnia.

T'ei l'amigo, o cameadda
ch'o bollitiga, o schersa, o ne demôa:
t'aivi o brindixi quande ëmo in sciampradda,
e t'aivi o complimento pe-a scignôa;
pe-o carlevâ zeneize
a sosta cö fä grande do marcheize.

Sempre, in ogni öcaxion,
t'aivi façile o verso e pronta a rimma;
pe tì, tûtto l'ëa bon,
te bastava, pe fâ fêugo, ûnn-a zimma;
dä rûmenta ammûggiâ da ûnn-a spassoïa
ti piggiavi l'aväo co-a fantaxia.

Pe fâ ûnn'ode, ûn sûnetto,
ti no aveivi da fâ che arvî o bronzin,
e o verso o sccioïva zù limpido e scetto
comme l'aegua de questo fontanin,
de questo fontanin dove doman
i zeneixì ûnn-a sciô, tûtti, portian!

1920