Bolle de savon/A l'é ûnn'ätra madonna!...
| ←O Prestito da Paxe | Bolle de savon de A l'é ûnn'ätra madonna!... |
A-o Poeta Zeneize→ |
Cäo Ninetto: - chì all'Isoa no gh'é ninte de nêuvo:
se spera che a gallinn-a presto a ne fasse l'êuvo;
e se spera che l'êuvo o segge de duî rosci
e de poeì dî a-o tedesco: pe ûn pö ti no n'angosci!
Che festa allöa, che sciato con quello co-co-dê!...
comme sä bella a taera! comme sä bello o çê!
Tûtti a casa i figgiêu, in te brasse ä mamà
chi torna - finalmente! - a fâghe fâ a nanà. -
Povie moae sante! vivan in continua apprenscion,
e ghe và pe traverso quello grammo boccon:
meschinette! o l'é ûn spaximo d'ogni öa, o l'é ûn battichêu,
e sospian che paan mantexi: - ciamman i sò figgiêu,
gïando pe-a casa lûvega, comme anime dannae...
Ah, se i figgiêu savessan comme son adorae!..
Ma perdiâ presto a vipera o dente do veleno,
scentiâ e nûvie e veddiemo presto l'arcobaleno. -
Cöse a l'é questa lûxe chi n'intra da-o barcon?
Chi a porta?... ûnn-a madonna?... dunque, e madonne ancon
passeggian comme a i tempi do nostro Barabin
c'o fava coscì belli co-e madonne i bambin?...
A l'é ûnn'atra madonna: - sciù! gente, faeghe röso:
a no l'ha e dozze stelle, manco o bambin in scöso:
a l'é ûnn'atra madonna: - sò lûxe a civiltae,
i sò nommi son: paxe, giûstizia, libertae.
Pe questi nommi quanti combattendo son cheiti!
santi martiri! seggian mille votte beneiti;
e seggian mille votte beneiti anchêu e doman
e mensunae da tûtti ne-o tempo ciù lontan.
Dall'Isoa do Canton 1918