Ro Chittarrin/À ro signor Domenego Invrea
| ←In lode dro dottissimo paddre Marco predicatô | Ro Chittarrin, o sæ strofoggi dra muza de À ro signor Domenego Invrea |
Pe re noççe feliçissime Pravexiña=Duraçço→ |
DOMENEGO INVREA.
SONETTO.
Signor Domeneghin, voî che in Parnaxo
Hei manezzao ro Pegazeo Cavallo,
E à re Muze trovæ sì ben ro stallo,
Che Apollo ha de voî stimma, e ne fa caxo:
Per cose avei piggiao così in dezaxo
E sciù l'órça Gian Giacomo Cavallo,
Che o l'è ra mæ delicia, e ro mæ sciallo,
E ro lêzo e relêzo, e poi ro baxo?
Ve prego per piaxei, con attençion
Lezzeiro, per gustâne ro savô;
Poi, se ve pâ, buttæro int'ro tanon.
Che se scœuvo da voî questo favô,
Son çerto, che cangiao d'opinion
O l'acquisterà grao, laude, e onô.