Ro Chittarrin/À ra signora Dominica Cosarini Latilla
| ←Con ra fronte de rœuze e giásemin | Ro Chittarrin, o sæ strofoggi dra muza de À ra signora Dominica Cosarini Latilla che à ro teatro de S. Agostin sosten ra parte de Primma Donna in ri doî drammi Siface e Venceslao con applaoso universale |
Non ve porei mai cræ, bella Maxiña→ |
DOMINICA COSARINI LATILLA,
Che a' ro Teatro de S. Agostin sosten ra parte de Primma Donna in ri doî Drammi Siface e Venceslao con applaoso universale.
Ma ælan cose da fâ strasecolâ!
De sentî ra Latilla in quell'arietta
Stâsene a tù per tù con ra trombetta
Con ro sciao à mezura à gorghezzâ!
E chi moæ à cópella ghe pœu stâ
Con quella voxe sì schillente e netta?
Mi m'aspêto miracori, e uña fetta
De çê carâ zù in terra à vei e toccâ,
Oh se Luçinda à Caximiro allora
In campo armato quando a l'ha sfiao,
Ghe cantava à sto mœuo uña demora!
Dæto per perso, o l'averæ buttao
Ra spâ, ro brandicû zù à ra malora,
E à ri pê o ghe cazzeiva li incantao.