Resveggin 1845
| Resveggin pe-o monumento de Cristoforo Colombo de |
| Zena, Sordo-mutti, 1845 Exemprâ conservao inta libraja Beio de Zena |
|
La dai monti, se ö savian, Cai Zeneixi, ve burlian!
|
RESVEGGIN
PE-O
MONUMENTO DE CRISTOFORO COLOMBO
Ohè! Zeneixi! Cose fæ?
L’ho da dî?... Pâ che demoæ!
De Colombo ö monumento
Voeì fâ forse con do vento?...
Con progetti, ciarle e ciæti
Creddeì forse fâ di fæti?
Là dai monti, se ö savian,
Cai Zeneixi, ve burlian!
Ve burlian de là da-ö mâ,
Ve burlian da tutte e parti;
Tutta Italia a se stupiâ
Comme Zena pe-e belle arti,
Pe un so figgio tanto grande
A no veuggie spende e spande,
A no veuggie finalmente
Conscideâ che antigamente
No l’han dita zà superba
Pe progetti solo in erba,
Ma perchè i so Çittadin
Generoxi, intraprendenti
Fiña l’ultimo quattrin
Consacravan ai portenti
D’ogni specie in costruzion!
Ogni strada, ogni canton
Ve dimostra sta veitæ!
Giæ con mi tutta a Çittæ,
Miæ i palassi, e Gexe, i uspiæ!
Miæ a lanterna e muagge, i meu!
Dime poi se ai vostri poæ
S’assomeggian ciù i figgieu?
Là dai monti, se ö savian,
Cai Zeneixi, ve burlian!
Ve burlian perchè se veu
Che seggiæ farçii de scui,
Che ve manche un po de ceû,[sic]
Che pe spende seggiæ dui,
Che pe-ö sodo e pe-ö quattrin
Studiæ troppo l’abbacchin.
No saa veo.... anzi protesto
Che ö l’è un torto manifesto
Fæto a-ö spirito Zeneize,
Sobrio scì, ma sempre dæto
A-e grandiose e belle impreize
(Da-ö ciù a-ö meno!) e se ö l'è stæto
Da-e vicende un po abôtio
O n'è ancon tutto svampio.
Mi no parlo d’atre pratiche
Indigeste a-a concluxion,
Parlo d’opere, de fabriche
De recente costruzion.
O san tutti a Zena e feua
Che delizia è l’Accaseua,
L’Accademia, ö gran Teatro!
Quanto a-e stradde no diggo atro!,.
Miæ che portici!.. No basta;
Miæ ö terrasso che sovrasta!..
Son lavori da giganti ..
Ma no basta! Andemmo avanti;
Miæ l’azzunta di dui meu!
Miæ abolii quæxi i risseu
Lungo e stradde principali! —
Miæ ö Sciffon co-i so canali! —
A grand’opera, cai fræ,
Me scordava de çitâ
Che a fa onô a l’umanitæ
(Co-a so stradda che a gh’andià)
Veuggio dî do Manicomio,
Cosa degna d’ogni encomio!
Cai Zeneixi, tutto questo
Va beniscimo e veddeì
Che a difendive me presto,
Ma no basta, e permettieì
Che ve leze senza raggia
O reverso da medaggia.
No parliò de Ciassaneuva
Dove sempre se ghe preuva
Una triste sensazion
Per l’informe casamento
(Vea trabacca do seiçento!)
Che ö nasconde ö caporion
Di palassi da Çittæ!
No parliò de quello a fâse
(Se però se n'ha ciù cuæ
Doppo a preuva!) pe adunâse
I Scignori Decurioin,
Non da Gexa da Nunziâ
Zà ben ben incamminâ
Perchè a forza de funzioïn,
De limoxine, orazioïn,
De sospii, sottoscrizioïn,
Lotterie, elargizioïn
L’è riuscio a un Padre degno
De portâla zà a bon segno.
Bella gexa incomparabile!
Bello veddila finia!
A ö saa presto?.. L’è sperabile.
Fra un pâ d’anni?.. E coscì scìa.
Dunque mi no ve parliò
Nè de questi, nè de tanti
Gren travaggi che omettiò
Perchè diti da eleganti,
Boin scrittôi, Regiña e Tocca.
(Bocca taxi!.. A Lô ghe tocca!)
Ve parliò do Monumento
A Colombo destinou!
A Colombo, da trexento
Quarant’anni trascurou!
A Colombo, primma gloria
De quest’Inclita Çittæ,
A ciù bella e triste storia
V’avian dilo i vostri poæ.
Tanto megio!.. Stæ a sentî,
Quattro cose e veuggio dî.
Da Domenego e Suzanna,
(Povea gente) ö l’è nasciuo,
Con so poæ ö sgarzava a laña;
Poco agiutto de seguo,
Perchè zà ö no poeiva vive
Senza leze o senza scrive.
De l’etæ de quattorz’anni
O s’è misso a fa ö mainô.
(Nonostante mille affanni
Profescion indovinâ!)
Doppo un lustro ö comandava
De Renato uña galea;
Pe-a Repubblica ö l’andava
Verso e Isoe da Morea;
In un viaggio ch’ö l’ha fæto
Çento leghe in là ö l’è andeto
Doppo Islanda, antiga Tile.
Ve-ö crediesci? A so scoverta
(Cose proprio da no dile!)
A l’è stæta a Zena offerta,
A Venezia, a-ö Re de Fransa
Senza aveine uña speransa!..
L’Inghiltæra a l’ha burlou,
A Lisboña I’han tradio,
Ma lê fermo e rassegnou
O sperava sempre in Dio. —
Con so figgio ö scappa in Spagna
Da-ö Re accolto e da-a Regiña,
Ma anche là ö trovò a magagna!
Tutta a corte a se sagriña
Perchè un ommo senza titoli
Un fanatico, un Zeneize
O ghe tocche in çerti articoli
(Favô regio, Onori e Speize!)
Ghe n’han fæto d’ogni meña,
Da lasciâghe o fî da scheña!
Anni ed anni ö l’ha patìo
Quanto un ommo ö peu patî!
O n’è morto perchè Dio
Voeiva un mondo fâ scrovî!
Finalmente ö l’è riuscìo
Træ barcasse a fâ allestî
(Olim dite caravelle),
Finalmente fu con quelle
Verso ö milleçinquecento
(Primma eutto anni ai treì d’agosto)
Che da Palos con bon vento
O partì deciso, a costo
De no poeighe ciù tornâ,
Neuve tære de trovâ.
A-e Canarie ö l’ha toccou,
A-a Gomea ö s’è fermou,
A-e so navi dæto assesto
De settembre ö giorno sesto
Pin de fede e de coraggio,
O s’è misso torna in viaggio.
Comme ö vento ö fà cammin.
De seltembre verso a-a fin
O veddeiva Oxelli sgoâ,
Feuggie verdi gallezzâ,
Tulte cose che a-ö mainâ
Ghe fan tæra indovinâ.
Ma per quanto in là s’andava
Ægua solo se trovava.
I Spagnolli spaventæ
De no vedde atro che mâ
S’ean due votte ammutinæ
Inderê voeivan tornâ.
Zà (Colombo rifiutand )
Se studiava ö comme ö quando
Liberâsene a-a spagnolla
Co-uña lamma senza molla.
Ma Colombo tanto bon
Quanto fermo d’opinion,
Con raxioin che paivan vee
Co-e so affabili manee
Tanto e tanto ö i ha preghæ
Che se son capaçitæ.
Infeliçe! ö l’ha patìo
Quanto un ommo ö peu patî!
O n’è morto perchè Dio
Voeiva un mondo fâ scrovî!
L’ëa d’ottobre ö nono giorno
Quando questo succedeiva;
Do so graddo quæxi a scorno
Ai Spagnolli ö prometteiva
Che se tæra ö no scroviva
Fra treì giorni a-a mæxim’öa,
Pe tornâ de Spagna a-a riva
O l’aviæ virou de prôa.
O giorno unze han fæto pesca
D’erbe, zunchi e fruta fresca,
D’un baston riconosciuo
Da-a man d’ommi travaggiou.
Se va avanti!.. Se fa scuo,
Ma Colombo ö sta sveggiou
Drito, immobile in coverta,
Sempre attento, sempre a l'erta,
Perchè manca un solo giorno
A-a promissa do ritorno.
L’ëa dex’ôe!... Ghe pâ de vedde
Luxî un lumme da-a lontan!..
A-a so vista ö no veu credde,
(Che momento!) ö porta a man
Presto ai euggi che freghæ
Ghe rinneuvan a vixion!
Presto ö ciamma duì mainæ,
O ghe mostra co-ö so dìo...
Cose?... O lumme o l’ëa spario!!!
I mainæ quella ciammata
L’han piggiâ per uñ’alzata.
Barbasciuscia! No-ö creddeivan
Forse manco se ö veddeivan!
Cao Colombo! Chi peu dî
Chi peu solo immaginâ
Quante peñe, quanti doî
Quella neutte a t’è costâ!
Quante votte a-ö Çe voltou
Con preghee ti l'l stancou!
Quante volte a Dio ti æ dito
Se no gh’è un mondo a scrovî
Fæne un presto, fælo fîto,
O levæme da patî!
Ma veddieì che tanta fede
A n’andià senza mercede! —
Spunta ö giorno e... Tæra!! Tæra!!
Sentì criâ, Tæra risponde!
Un mainâ l'atro ö l'affæra,
O ghe mostra i monti e e sponde!..
Gh’è chi cianze, gh’è chi cria,
Chi se baxia, chi s’abbrassa,
Chi se spuncia, chi se tia
Pe-a coverta, chi se sbrassa
Sciù pe-e corde, e chi fra i atri
Incommença un Gloria patri,
Chi ö Tedeum, chi a Salve o l'Ave;
Ciæo dall’uña all’atra nave
Se veddeiva, se sentiva
Criâ da tutti: evviva! evviva
L’ammiraglio, ö gran Colombo,
Vicerè do neuvo mondo!
Che fracasso! Che rimbombo!!!
Ma ö silenzio ciù profondo
Tanto sciâto ha seguitou!
L’è comparso inzenuggiou
Sorva ö casseo ö gran Zeneize
Volto a-ö Çe co-e brasse steize!
Tutti a un tempo in zenuggion
Fan divoti a so orazion!
Chi porrieiva dâ l’idea
D’uña scimile preghea?
Mi no çerto!... Ho troppo sprescia
D’andâ in tæra con l’Eroe,
Tanto ciù che là ghe mescia,
Che g’ho visti (e no son foe!)
Ommi e donne a dirittua
Tali e quali i fa a Natua.
Dunque a tæra!... Dito e fæto;
L’Ammiraglio ö gh’è zà andæto,
O n’ha a pôvee zà baxiou,
Zà uña Croxe ö g’ha ciantou
Pe indicâne a Redenzion:
A bandea do Rè Fernando
Pe-ö possesso da Nazion,
Ogni regola osservando,
Doppo a Croxe ö g’ha fissou,
Dai Spagnolli secondou.
Se trattava poi de fâ
I nativi avvixinâ,
Che scappavan, ritornavan,
Aggueitavan, s’ascondeivan,
Che comme aquile sbraggiavan
Se andâ incontro se vedeivan.
S’ëa frattanto rimarcou
Che quantunque un pò spujoze,
Anche là (miæ che peccou!)
Tutte e donne ëan cujoze!
Ciù assæ di ommi s’accostavan,
Ciù de spesso ritornavan. —
Cose voeì! Colombo a-a fin
Con sunâghe un sunaggin,
Con mostrâghe qualche boa,
Qualche bæcia con di frilli
O i ha fæti avvixinâ.
Van a sâti comme i grilli!...
Scappan!.. vegnan!.. se retian!..
Pâ che rïan, escì no rïan
Che ghe tremma e gambe e i pè.
Fan treì passi... un inderè.
Ma Colombo assæ de megio
O l’aveiva preparou;
O presenta a-e donne un spegio
Che l’avieivan menissou
Pe piggiâse-ö fra de lô,
Se Colombo, tutto amô,
Intromisso ne-a ratella,
O n’avesse a questa e a quella
Con pazienza e con manêa
Fæto vedde a propria cêa.
Miæ se ö mezo ö l’ha trovou
D’appagâ quelle spujoze!
Anche là (miæ che peccou!)
Tutte e donne ëan ambiziose!
Quanto a-i ommi cian... cianin
Son vegnui ciù da-a vixin.
Se capisce che i sorprende
O vestî di Europei;
Ghe paan opere stupende,
Corpo e roba i creddan Dei.
Ma lascemmo questa gente
Co-i Spagnolli accomodâse,
Tanto ciù che l’è prudente
Træto, træto de posâse;
L’è prudente piggiâ fiato
Primma sempre de fâ un sato;
Fæto questo, seguitiò
Ciù de sprescia che porriò.
A non ea d’un continente
A scoverta raccontâ;
A l’ea uñ’Isoa da-a so gente
Guanahani nominâ.
Ma Colombo d’êse vivo,
Da scoverta, dell’arrivo
Dando merito a-ö Segnô
O-a ciammò S. Salvatô.
Poco doppo ö l’è partìo,
Fra ponente e mezogiorno
O l’ha fæto un lungo gìo:
Haiti e Cuba e tutt’intorno
Mille tære ö l’ha scoverto.
D’Haiti un scito ö l’ha preferto
Per alzâghe uña fortessa.
Pe quest’Isoa (pe-a ricchessa
De minee che se ghe treuva,
Pe-ö carattere ch’ö preuva
Di nativi tanto bon!)
Pâ ch’ö sente propenscion.
O-a battezza de Spagnolla,
O ghe lascia guarnixion,
Che ben presto a me ghe molla
Co-ogni sorta de pascion...
Pe-a donnetta e pe amuggiâ
L’ôu a cuffe e pe obbligâ
A trovâlo con çercâlo,
A scavâlo, a trasportâlo
Quelli povei naturali
Amoroxi, liberali,
Ma che stanchi a-a fin da fôa
Gh’han cangiou e carte in tôa.
Conti averti!!! Noi frattanto
Con Colombo andiemo in Spagna
Verso Palos dove tanto
Se dispera e se ghe lagna. —
O gh’arriva ö chinze marso
Sette meixi e dozze giorni
Doppo d’êsine scomparso.
Ne-ö so viaggio a duî soggiorni
E tempeste l’han forzou;
Uña a l’Isoa Santa Maja
L’atra a-ö Tago l’han portou;
Senza veje e tutta avaja
A so nave gh’han lasciou.
Mille votte d’êse perso
Co-a so gente ö l’ha pensou,
Zacchè paiva l’universo
Contro a nave scadenou.
Finalmente! ... eccolo in tæra!...
No gh’è paxe doppo a guæra,
No gh’è gioja manifesta
Che ve posse da uñ’idea
Do gran giubbilo, da festa
Che a Colombo fæta a l’ea.
O l’è un fremito, un trambusto
Che ö fa cianze, eppù ö da gusto;
O l'è un inno che ö s’intoña
Pe Colombo, e ö no finisce
Che a-a çittæ de Barçelloña,
Dove a corte a comparisce
In gran galla; dove s’alzan
I monarchi driti in pê
Quando sentan che s’innalzan
Crii d’evviva, e ö veddan Lê
Preceduo da varj Indien,
Da-i mainæ do neuvo mondo.
(Che momento!..) Eccolo!.. O ven!..
Gh’è un silenzio ö ciù profondo!
O sta lì pe inzenuggiâse,
Ma i sovrani ghe fan segno
De stâ drito..., d’assettâse.
Miæ che onô, che contrassegno
De favô, de grande stimma!
Ferdinando ö veu che primma
D’ogni cosa ö ghe racconte
O so viaggio, a so scoverta. —
Ben o mâ, mettendo a monte
Fæti e tempi, v’ho zà offerta,
Cai Zeneixi, a descrizion.
Dunque basta. Quanto a-ö resto
Diò con tutta discrezion
Che Colombo ha continuou
A viaggiâ, a scrovî de tære,
Che ö l’è stæto calunniou,
Che gh’han fæto orrende guære
Boyl, Fonzeca e Bovadiggia;
Che quest’ultimo in ta chiggia
D’uña nave incadenou,
Comme un ladro, ö l’ha mandou
In Europa, cioè ne-a Spagna,
Dove l’empia Camarilla
Di so amixi a se guadagna
Favô in corte, e a ghe distilla
Tutto quanto ö so veleno
Contro ö gran navigatô.
No-ö veuan veddilo nemmeno:
Se ghe leva graddi, onô:
No se veu nemmeno intendio,
Se ghe nega ö so stipendio!
Se ö presenta ö regio patto
Pe-a scoverta sottoscrito,
Ghe rispondan che ö l’è matto,
O rimandan co-o so scrito.
Infeliçe!.. O l’ha patìo
Quanto un ommo ö peu patî!
Per ciù gloria forse Dio
O-ö lasciò tanto soffrî!
Ma sfinìo dai patimenti
D’ogni sorta che ö provava,
O sentiva che momenti
Pochi a vive ghe restava.
L’ëa do milleçinquecento-
Sei, de marzo ö giorno vinti
Quando l’ultimo lamento
I so sensci ö reize estinti.
Da cristian ö l’ha vosciuo
Moî, sciccomme ö l’ëa vissuo,
A-i nemixi perdonando,
A-i so figgi ricordando
D’amâ Zena, so diletta,
So caa patria benedetta,
Per cui sempre ö sospirava
Se qualcun ghe ne parlava.
Voei de ciù!... Ne-ö testamento
Per mostrâ ö so attaccamento,
A-i so cai conçittadin,
Pe rescioâli, pe levâ
A gabella gran e vin
(Miæ se megio ö poeiva fâ!)
Un legato ö gh’ha lasciou
(Forse poi dimenticou!).
Che grand’ommo!!! Che scoverta!!
Che risorsa immensa averta
A-ö commercio, a-e scienze, a-i arti!
Miæ, Zeneixi, in quante parti
L’Evangelio ö l’ha portou!
Quanta gente ö l’ha salvou!
Se ve parlo de praesenti
Miæ che Stati, che Çittæ!
Miæ che popoli potenti
Se ghe son organizzæ!!
Primma causa e belle impreize
Do grandiscimo Zeneize !!!
Cose son a-ö so confronto
I ciu gren conquistatoî?
Pe da gloria, a proprio conto,
Mijoin d’ommi han fæto moî!
Ma Lê invece co-ö so stento
Mijoin d’ommi ö l’ha redento!
Cose l’ëa, cose l’è mai
Qualunque altro viaggiatô?
Lê ö |'è ö meistro, lô i scolai;
Luxe e stelle doppo ö Sô!
Quanta gloria! Quanto onô!
Pe-a so patria quanto amô!
Miæ che stimolo a fâ cose
Grandi, immense, strepitose!!..
Sci?... Vedemmo... Cose fæ?
L’ho da dî?... Pâ che demoæ!
Là dai monti, se ö savian,
Cai Zeneixi, ve burlian! —
Doppo l’ultimo Congresso
Di Scienziæ a Milan seguìo
De Colombo assæ ciù spesso
In Çittæ parlâ ho sentìo.
Gh’ëa fra ö numeo di Scienziæ
Di Zeneixi, di boin fræ,
Che a-a so patria de ritorno
Se son dæti un po d’attorno
Con parlâne a tempo e leugo.
Sotto a çenee gh’ëa do feugo,
Cos’han fæto? Gh’han sciusciou;
Mille zimme ö l’ha mandou!
Zimme solo?... Ghe veddiemo...
Fæti i conti ne parliemo.
Son zà quattro o çinque meixi
Dacchè l’ottimo Sovrano
Ciù che Re poæ di Zeneixi,
Generoso, giusto, umano,
Con l’esempio, con çinquanta
Mila franchi ad hoc offerti
(Cosa bella e quæxi santa!)
O v'ha reizo allegri e çerti
Da so augusta protezion.
Miæ Zeneixi che lezion!
E con questo cose fæ?
L’ho da dî? Pâ che demoæ!
Se doveiva in un momento
Vedde fæto ö monumento:
Ttti, tutti ad uña voxe
Da-a Lanterna fiña a-a Foxe
Criavan viva! benedetto
Segge l'inclito intelletto,
Che ö l’ha mosso a gran pediña!
In Çittæ perdingoliña
No sentivi ciù a parlâ
Che de voeì concore e fâ
Mari e monti, færo e feugo!
Se parlava zà do leugo,
Ogni cosa a l’ëa za inteìza,
Se parlava za da speìza
Ninte meno d’un mjion!
Quanto sciato! Che allegria
Non ha fæto a Comiscion
Quando a fu da-ö Re istituia?
E per dîla, gh’ean compreixi
Nommi cai, di vei zeneixi.
L’è sciortìo un manifesto
Che ö spinzeiva a dâghe a-ö resto,
Ben inteiso e megio scrîto:
Me credeiva fîto fîto
De sentî da Cajo e Tizio
Offrî somme a precipizio,
Perchè a dîla chi fra noì
Ghe son tanti e tanti Scioì
Che i dinæ i mesuan co-a cuffa,
Se appilæ n’han fæto a muffa.
Ve-ö crediesci?.. Sento dî
Pitoccate da stupî!!..
Là dai monti, se ö savian,
Cai Zeneixi, ve burlian!
Non intendo esagerâ
Se ve diò che sole çento
Scelte case peuan fâ
Da lô sole un monumento
Che l’eguale no ghe segge
Pe grandezza e pe mâvegge.
Notæ ben che ho dito çento
Perchè ö possan fâ pe rïe
Zacchè a tutte no ghe manca
Un mjion, duì, treì de lïe,
Altrimenti me bastiæ
Scægline uña... e saiva assæ.
Ma Colombo ö l’ea Zeneize,
Tutti han drito a intrâ ne-e speize,
Tutti devan concorrî
Per alzâghe un monumento,
Tutti han drito de poei dî
Gh’ho uña parte do mæ stento:
Ricchi o no, grendi e piccin
Son sò fræ, son çittadin:
Tutti han drito a dî ai foëstê
Semmo degni ancon de Lê;
Se fin aoa emmo tardou
No l’aveivimo scordou,
L’ëa che noi semmo usi a fâ
Tutto ben e ninte mâ:
Pe fâ ben non eimo a tempo,
Gh’ëa delungo un contrattempo.
Miæ però... Dì, voì foëstê,
Semmo degni ancon de Lê?..
Là dai monti, se ö savian,
Cai Zeneixi, ve lödian!
Dunque all’opera. Fæ presto.
Ne-ö primm’anno doppo questo
Gh’è ö congresso di Scienzæ.
Ah! se fosse mai poscibile
Preparâghe incamminæ
Zà i travaggi!... L’è imposcibile,
Capì ben, de faghei vedde
Zà ultimæ, se s’ha da credde
Che per poco s’aggie cuæ
De fâ cose dove regne
Do grandioso e perciò degne
De Colombo e da Çittæ.
Dunque a Voì, sciâ Comiscion,
Adempì a vostra miscion.
Presto... via... sollecitæ.
Va ben scrive e çitâ tæsti,
Va ben fâ di manifesti:
Va ben tutto, ma vorriæ
Doppo i scriti vedde i fæti. —
No stæ a temme e ciarle, i ciæti
De chi a veu ciù crua che cheutta:
A sta figgia fæghe a deutta:
V’aggiuttian i collettôi;
No dæ mente a-a condizion;
Uña luxe a fa ciù coî,
Ricchi e povei fan nazion.
Giæ pe-e case pe-e butteghe,
N’aggiæ puïa che se ve neghe
Dove a doppia, dove ö scuo.
Anche ö popolo menuo
O ve daa qualche scassin,
Qualche franco, qualche mutta;
Piggiæ tutto... Son dinæ
Da-a fadiga consacræ.
Allon, via, metteive sutta.
Començæ, fæve do cheu,
Ve lôdian fiña i figgieu,
Che fæti ommi trasmettian
Ai so figgi i nommi vostri
Pe-ö travaggio che veddian
(Spero) fæto ai giorni nostri,
Pe-e fadighe consacræ
A Colombo, a-a so Çittæ.
Quanto ai ricchi, stæ segui,
Ve mandian a sacchi i scui;
Destanian da-e so cantiñe
A miggiæa zecchin, rosciñe;
Ghe ne saa da mette a-a luxe
A datâ da-ö primmo Duxe.
Ve-i mandian, no ghe pensæ.
Eì da criâ, no ciù.... L’è assæ.
Dunque addio... Se mai v’ho offeizo
Accusæne ö patrio amô;
Se v’ho punto non ho inteizo
Che n’avesci a sentî dô.
Fæ coscì... Provæ co-ö fæto
Che he mentìo... che ardìo son stæto
Quando ho dîto un po pe rïe
De veitæ che... paan boxïe.
Dunque allegri!... Semmo inteixi.
Là dai monti . . . . . . . .
. . . . . . . . . Addio, Zeneixi!
.jpg)
.jpg)