Ra cittara zeneize 1636/Partensa per marinna
| ←torna a l'èndexo | Ra cittara zeneize de Partensa per marinna |
Patí per gove→ |
| Zena, Gioxeppe Pavon, 1636 In corscivo e ligatue. |
Per Marinna.
1.
Partí da ra sò vitta,
Cara Bella, oh' che morte;
A Carta, ò Calamitta
Confiá ra sò sorte
Oh' che affanno, oh' che vive
Duro da immaginá nò che da scrive.
2.
Parto, ve lascio, oh' Dio
In quenti squarsi, e parte
L'Annima in dive adio
Se me strassa, e se parte;
Unna stissa d'inchiostro
Com'è bastante à dí quanto son vostro?
3.
Son vostro ò Bella Cara;
Sarò vostro in eterno
L'Annima in ogni cara
Farà vitta d'Inferno,
Larga da ri vostri oeggi
Che farala de care, ni de scoeggi?
4.
Frusta, languida, smorta
Da tutt'hore dolente,
L'odirei lì à ra porta,
Spirito impaziente
Repricave in prezensa
Quello ch'à ve protesta oura in partensa;
5.
Che à vuoi sola nassua,
Per vuoi sola à respira;
Che ro luoego ch'à mua
Nò porrà moæ partira
Da ro sò proprio luoego,
Da vuoi foera dra quà l'è dentro foego.
6.
Mà zà sento ro tiro,
Cangio ro canto in chienti;
Mando questo sospiro;
Vaggo pe ri me venti;
Amó, che bella festa?
Come posso partí, se ro cuoe resta?