Ra cittara zeneize 1636/Patí per gove
| ←torna a l'èndexo | Ra cittara zeneize de Patí per gove |
Chiarabella→ |
| Zena, Gioxeppe Pavon, 1636 In corscivo e ligatue. |
Canzon Seconda.
1.
Pù che Amó me fasse vei,
Oeggi belli desperæ,
Quelli sguardi un dì cangiæ,
Onde puei,
Se vorei,
Fá ri cuoe resuscitæ
Sæ per mi ra pietæ morta
Nò m'importa.
2.
Seime rigidi in barcon
Se me vei pe ra contrá;
In re veggie fæme fá
L'arbicon,
Stæme in ton,
Sensa moeve, ò parpellá;
Pertuzæme à ogni momento
Son contento.
3.
Gusterò d'esse giassou
Pe re bocche dri Citten,
D'esse fora dri mezen,
Ballezou
Mordiggiou,
Com'appuinto da ri chen;
D’esse à tutti ro sorasso,
Ro scovasso.
4.
Mà se un dì me compatí,
Che cangiæ con mì lattin,
Che mi monte sto scarin
De puei dí;
Che aggradi
Ri me stenti in sciù ra fin,
Oh che ammareghi ben speizi,
Che pareizi.