Ra cittara zeneize 1636/Invio a ri scuoeggi
| ←torna a l'èndexo | Ra cittara zeneize de Amoî mainæschi |
Ballin, me dixe Amó→ |
| Zena, Gioxeppe Pavon, 1636 |
Canzon III.
1.
Za l'Uverno comensa à fà fassietti
Te ne fà fæ ra neive, chi descazze,
Maxinna da ri Monti in ve re chiazze
Rò Má, chi boggie tutto de gianchetti.
2.
Tempo e zuoemoæ de trase de sciverno
De levase de cà dá fá ra ruzze
Maxinna, de parlá ro tempo fuzze
Per nò voze chiù fassa in sempiterno.
3.
Zà che pinna de tribuli è ra Terra
Viva ri scuoeggi larghi da travaggi
Onde à son de paramiti, e resaggi
Dì è nuoette à ri pesci se fà guerra
4.
Chì se ben l'hommo vive à ro compasso
Per havei tanto da scampá ra vitta
Quand'ò fuisse chiù magro che unna Gritta,
A ra vista dre secche ò se fà grasso.
5.
Perche ró Má, chi hà libertæ da matti
Fà che all’aren dro scuoeggio guste chiue
Unna pittansa de Pattelle crue
Che in Terra cento misse, e cento piatti.
6.
Solo n'è dæto Amó per contrapeizo
Per tegnine à ro cuoé sempre ra spinna
Oh s'ò nó fuisse lè chi n'assassinna
Maxinna, che trionfi de Pareizo.
7.
Pú se ben lè con mille tentativi
Per nò lasciane cado sotte lengua
Ri nostri gusti sempre ò ne perlengua
Ogni poco rescioro ne ten vivi.
8.
Vegni dunca à gustá dra compagnia
Chi se pá orba senza ra tò vista
Ballin, con ri pescoei chi tutti in lista
Tutti t’aspetan come ro Messia.
9.
Lè per havei l'onó de questo invio,
Te manda ro schifetto, e questo foeggio
Ma se ti tardi un solo batti d’oeggio
A reveise de là, Maxinna adio.