Ra cittara zeneize 1636/Invia ra Muza à ro bosco
| ←torna a l'èndexo | Ra cittara zeneize de Invia ra Muza à ro bosco |
Cançoin çivî→ |
| Zena, Gioxeppe Pavon, 1636 In corscivo e ligatue. |
per canta dre arme
1.
A ro Bosco, chi rie;
A ro lago, chi brilla;
A ro sciumme chi axilla
Zù pe re Pradarie,
Chi scuggia chì, e lì com'un'anghilla,
Oura che in ogni parte
Tutto ro Mondo è dominou da Marte
Vegni Muza à gusta per un'assazzo
Questa saxon Bellissima de Mazzo;
A gove chì, donde ra guerra taxe
Ro rescioro dre ville in santa paxe.
2.
Atri intanto travaggie
Veggie intorno à re porte
Atri se fasse forte;
In trinciere, e muraggie
Per scappora questa beneita Morte;
Atri arrolle, e resegne;
Atri ghie re squadre atri re insegne
Atri mostre ra fronte à re frontere
Per defeiza de Zena, e dre Rivere
E in tromba chi pertuze ra montagna
Viva San Zorzo crie ra Campagna.
3.
Ro responde dre rive,
Ro repicco dre Valle,
A ra fronte, à re spalle
Sæ materia de scrive,
Ra nostra Muza ne trionfe, e balle
Noi con seigo atretanto
Invriæghi dra muxica, e dro canto,
Con passo de Lumassa, e de Trattuga
Sciù ri erboretti teneri com'uga
Lasciaremmo intaggiou: in paxe, e in guerra
Viva San Zorzo per Ma, e per terra.
4.
E se de quando in quando
Ro So per avventura,
Con piggia ra chianura,
N'anderà sequestrando
De macchia in macchia lì pe ra verdura
Assettæ sciu l'erbetta
All'arinto de quarche fontanetta,
In muoeo de dialogo tra nuoi
Con ghirlande de laode oura, e de scioi
Zena faremmo vei trà queste, e quelle
Degna d'esse porta fin à re Stelle.
5.
Comensando da cavo
Discorriremmo in rimma
Dri Zeneixi de primma;
Dro sò nomme si bravo
Zà tegnuo da ro Mondo in tanta stimma,
Quando à penna nascsui,
Per famma amarelæde conossui
Da quattro scuoeggi nui ancon de gente
Favan sta ro Levante, e ro Ponente
Fin de l'antora accorderemo in fæto
Che ro moto à ro Mondo han sempre dæto
6.
Testimonie dro vero
Daremmo à træ à træ
Re Teste incoronæ
Misse com'in un zero
Dro Scettro; de l'hono; dra libertæ;
Desmarchæ dra Coronna
Schiave à Zena menæ tutte in personna
Re Pize, re Venexe combattue,
Naveghæ mille votte per perdue;
Re terre là pe re marinne greghe;
Re Cittæ dominæ; re Grecie intreghe.
7.
Ri agni intanto, e ri lustri
Vozando ro sò corso
Con nobile trascorso
Duoi personaggi Illustri
Segneremmo[1] in brevissimo discorso;
Trà ri Doria un Andria
Reverio da pertutto à son de cria;
Un Ambruoexo in ri Spinnora stupendo,
In guerre formidabile, e tremendo,
Onde ra Famma fà tenti schiamassi
Fin à ro Ce da ri paeixi bassi.
8.
Lunga ordenansa, e bella
D'Antighi in guerra Orlandi;
In governi, e comandi
Da dane in croppa, e in sella
A ri Catuin chiù savij, e memorandi;
Fæti tutti d'un taggio,
Boin pe ra Patria à mettese à bersagio,
Comme fan fè per mirioin de caxi
Re statue dri Sanzorzi, e dri Paraxi
Chi stan lì com'à puinto in unna scena
A di cos'era quell'antiga Zena.
9.
Zena dro Ma Reginna,
Per essero in eterno;
Tribulo sempiterno
Dri Corsæ dra Marinna,
O per le mæsma, ò d'atri à ro governo;
Favoria da chiù bande;
Da ri Rè grendi reputa per grande;
Bonna in ti Stati à da mille repoeri;
Moære de figgi, ch'à ri Rè son poeri;
Aquile d'intelletti straprofondi
Corombi à descrovi ri nuoevi Mondi.
10.
Ri moderni accidenti
Dre guerre, e dri destrassi,
Onde in tenti relassi
De sospiri, e lamenti
Liguria fa savei ri suoe sconquassi
Se ben ro refrescari
Forsi è un fari chiù asperi, e chiù amari
Pù, per di ra Giustitia dra sò caoza
Con penna ni malevola, ni raoza,
Anzi con tegni drita ra baransa
Toccheremo in passa così in sostansa.
11.
Arme à forsa d'incanti,
De giastemme, e de raggia
Zù trà quella canaggia
De spiriti forfanti
Fæte per manda Zena à ra maraggia;
De là da maledette;
Arme in fin dro Diavo belle nette,
Se per castigo de quarche peccou
Messe Dommenende nò v'hà mandou,
A che fa sei vegnue da ro profondo,
A mette sottesovera ro Mondo?
12.
Mondo, onde in bella quete
Zena sciù ra so riva
Reposava, e dormiva
Con re suoe mente quete
Zà per cent'agni corona d'oriva,
Libera d'ogni guerre
Abondante de Popoli, e de Terre;
Trà re Coronne tanto chiù protetta
Quanto à nissun per libertæ soggetta
Ricca quanto de stato ben munio
Dra fè, che Christo zà ghe misse in dio.
13.
Per Zena donca à sdegno
Armandose re lanse
Dre Savoie, e dre Franse
Con stuoemago si pregno
E d'accordij, e de lighe, e de speranse
Per Zena sola in zuoego
Se metteivan tent'arme, e tanto fuoego?
E lè piggiá dro tutto all'improvista,
Per cosi lunga paxe manco avista,
De gente dezarmá, pueiva all'incontro
Moæ per raxon puei reze un tanto scontro?
14.
Meschinna, che farala?
Zà ro tron, e ro lampo
Dell'Innemigo è in campo
Che partio piggierala?
Che conseggio, e governo à ro sò scampo?
Za corran à trentenne
Re Artagiarie con bocche de ballenne;
Zá bruxan re Cassinne, e ri Villaggi
Zà s'investan ri Gavi, e ri Vottaggi
E à son de Tromba con ra lansa in resta
Za Marte, e Morte giubila, e fà festa.
15.
Vottaggio oh' che fragello
Veggo vegnite adosso?
Zà ra fossa, e ro fosso
Van tutti in un maxello;
Sangue ch'oura era rivo, e sciumme grosso
Odi de primo tiro
Andá ra Valle tutta in un sospiro
Come con ri figiuoe streiti, à ro mento
Morta ogni donna d'asmo, e de spavento
Come ogni Verginetta tremma, e sbatte,
Chi n'ha moæ visto cose sæ combatte
16.
Tì mentre l'Innemigo,
Com'un can se t'avventa,
Desperou t'accimenta
All'ultimo perigo,
A nò puei reze chiù tanta tormenta
Con mostraghe ra fassa
Affronta, scanna, ammassa chi t'ammassa.
E quando haggie ro Ce cosi prescrito
Che cazze oura Vottaggio à torto, è à drito
Cazi mà fà che mire rebattuo
L’Innemigo in ro tò ro sò derruo
17.
Sarà speraro certo
Che de si belle pruoeve
Portando in Cè re nuoeve
Re Annime de concerto
Per lo mezo à pietæ ro Ce se muoeve;
Che con vei tanto sguasso,
E de roba, e d'honó missa à fracasso;
Tante Giexe bruxæ guaste, e destrute
A strapassi sporchissimi redute,
Vistose, com'à dì, misso à ro puinto
Ro Cè ghe fasse vei cos'è da cuinto.
18.
Che mentre chiù bizarro
L'Innemigo in carrera
Scorrirà ra Rivera;
Goverà dro caparro
De veise zà li Zena sciù ra chiera
De Fiandra per un verso
Ri Garioin andandoghe à traverso
Chì con l'osso de Gavi per roziggio
Restando dri canoin netto, e zenziggio
Baste infin dra bestenta, e dra demora
Unna Bocchetta à chiodeghe ra gora.
- ↑ Segnermemo