Ra cittara zeneize 1636/Coronna dra giustitia
| ←torna a l'èndexo | Ra cittara zeneize de Coronna dra giustitia (1631) |
Invia ra Muza à ro bosco→ |
| Zena, Gioxeppe Pavon, 1636 In corscivo e ligatue. Gh'amanca i acenti aguççi. |
DRA GIUSTITIA,
MANDA DA RO CE
A RO SERENISSIMO
LONARDO
DA RA TORRE
DUXE DRA
REPUBRICA
DE ZENA.
IN RA SO INCORONATION.
1.
Muza che tra ri scuoeggi
Zà con bizarri abbiggi
De zin, de zonchi, d'areghe Marinne,
Lasciando ri orifoeggi;
Ri fummi, e ri puntiggi
Dre Deitæ, dre Maestæ divinne,
Sciù re corde argentinne
De cittara Zeneize,
In concerto idiotto
D'ambasciou sciabegotto
Con voxe anco in toscanna oura ben speize
Ti fessi à ra tò luxe
Chiæro un basso pescou denanti à un Duxe
2.
Oura che in nuoevi lampi
Se mira com'in Scena
Ricca d'un nuoevo So ra nostra sfera;
Che re Rive, e ri Campi
Trapassando de Zena
Porta Lumme à ra luxe forestera;
Ch'unna, e l'atra rivera
A son de feste, e canti
Ro nomme fà trascorre
Dro nuoevo Duxe Torre
De là dà ri Ponenti, e ri Levanti;
Che l'ære à son de Tromba
Lonardo Serenissimo rimbomba.
3.
Con manto da Reginna
Superbo, e Maestozo
Vegni Muza assetta sciù carro d'oro,
Vesti luxe divinna,
Habito luminozo
Mirabile per pompa, e per decoro:
Ro chiù ricco tesoro
Che ro Parnazo infonde;
L’ægua, che in gratia donna
Apollo in Eliconna
Fa che à sguasso, e à rebocco oura m'abbonde,
Onde passe ogni meta
De venna, e canto infuriou Poeta.
4.
Dre Torre in sciù re cimme,
Muza da ti rapio
Aquila m'erzerò fin à re Stelle.
Là trà re cauze primme
L'intelletto spedio
Baranserà queste sostanse, e quelle,
De fummi, e bagatelle
Virà pascese in terra
L'hommo à ro Ce nassuo
E muoeve ingrato, e cruo
Contra ro mæsmo Ce contrasto, e guerra
Superbo, rebellante
Pigmeo pretenso d'esse Gigante.
5.
Mirerà com'in spegio
De raggi trasparenti
Scrite in re carte dri decretti eterni,
Dro ben nostro, e dro megio
Re caoze, e ri accidenti,
Ri fondamenti, e ri segretti interni;
Che ri Imperij, e governi
De questo mondo chie
Onde ogn'un tanto aspira,
Chi ben dentro ri mira,
Tanto son veri Imperij e monarchie,
In quanto de lassue
Han reixe, e fondamento, e ninte chiue.
6.
Muza, mà chi me porta,
Con che forsa fatale
A stupo nuoevo oura lasciù de peizo?
Donna miro per scorta
In maestæ reale
Usci da gran Palatio dro Pareizo
Che à l'un dri fianchi appeizo
Stocco in Oro luxente
Per pompa, ò per uzansa;
Che in man ten ra baransa,
Con ra qua, per n'odi chì chiù lamente
Streita in arme, e in cavallo
A l'andà in Ce per habita de stallo.
7.
Con pe de neive pura,
Che in l'eterno viaggio
Atra via che de læte moæ nò stampa,
Là, donde ra verdura
Fà compari ro raggio
Chiù gratiozo dell'eterna Lampa;
Onde à fronte s’accampa
Con tromba dell'oretta
Desteizo pe ra riva
Bravo per prospettiva
Da pertutto un'exercito d'erbetta
Grave per portamento
Zà ra miro inviase à passo lento.
8.
E in giardin, che in disparte
A recammi tessui
De laberinti fæti à ro compasso
Sito squadra, e comparte
Con astreghi battui
A perle, e diamanti per strapasso;
Onde à ferma ro passo
Re vivagne d'arinto,
Dri rossignuoe ra canto
Re sciuoi de tanto in tanto
Mettan ro passaggie com'in procinto;
Ond'in forme villanne
Fan re ombre ombre, e bonombre intre fontanne.
9.
Dà ri costi, onde spande
Primaveiria superba
Tra foeggie chiù bislacche, e chiù pompoze
Re scioi, che fan dro grande
Dominando per l'erba
Con imperio re scioi manco fastoze,
Peonie maestoze
Reginne in sciù ri fusti
Roeze à rubin retræte;
Livij imperlæ de læte;
Cento, e mille scioi nuoeve à tutti gusti
Decimando à l'attressa,
E tra re scioi queste parolle à intressa,
10.
Figgio che in queste rive,
Ond'è larga ogni noia;
Onde moæ no se pruoeva hora infelise;
Onde vitta se vive
D'indicibile gioia
Eterna, insaziabile, felice,
Onde per trattegnise
Straccque dà ro componne,
Vegnan con mille sfersi
Re Reginne dri versi
A tesse à ri Poeti re coronne,
Per grazia oura t'è dæto
De vaghezza queste bellesse in fæto.
11.
Questa, ch'oura ti miri
De nostra man tessua
Trà brocchetti, e carzuoe con tanta tresca;
Trameschia de Zaffiri;
A Stelle repassua
Coronna così bella, e così fresca,
Onde l’arte, chì tresca
Chimerizando incastri
Con groppi, e con modelli
De scioi meschie à gioielli,
Tra coruoi de smeraldi, e d'alabastri,
Con girozo contrasto
Asbassa à ra Natura ogni sò fasto.
12.
A quello gran LONARDO
Portara, chi hà in governo
De Zena, e dra Liguria oura ro stato,
Che con provido sguardo,
Con conseggio paterno
Seze oura Duxe in quello gran Senato;
D'intelletto tant'ato;
De bontæ così rære;
De virtù così sode;
Degne de tanta lode;
Eletto con re balle à centanere,
Prima in Ce che à ro Mondo
Da ro Ce, chi no vosse esse secondo.
13.
Dighe che un'atra eternà[sic]
A ro son dra sò famma
Chì tra nuoi zà mirabile, e stupend[o]
Mentre le zù governa
Ro Ce sciù ne recamma
Ra qua de nostra man se stà tessendo;
Che per gusto n'appendo
Spesso trà questi rammi,
In muoeo de ghirlanda,
Ro sbosso in ogni banda
Con abbelline tutti questi andammi;
Che zà, con fane chiassa,
Tutto ro Ce ne giubila, e ne sguassa.
14.
Che intrepido ò sostegne
Con cuoe libero, e franco
Ro peizo dro governo, e dro comando;
Che incorrotta ò mantegne
Pe ro chiù, pe ro manco
Ra giustitia, che in le se stà spegiando;
Che ro Ce destinando
Con scrive, e con vei tutto,
A oeggi chiù che d'Argo,
Per quanto ò poere largo
A sì belle acioin brasso d'agiutto,
Chioverà d'ogn'intorno
Gratie à Zena in sò grazia, e nuoette, e giorno;
15.
Così dà re tempeste
In sò preghera uscia
Dre guerre, onde ro mondo pa ch'arraggie
E da famme, e da peste
Preserva, favoria
Mentre l'Italia tutta è intre tenaggie,
Coronna de muraggie
Nuoeva à re suoe venture,
Erzendo per trofeo,
Com'in Campo, ò Torneo,
Per intorno ri monti, e re chianure
Farà tutto à unna voxe
Stupi ro Mondo in mirioin de croxe.
16.
Muza, taxi, no chiù, ti no t'accorzi
A re bocche, à ri sguardi,
Che parla ro Semin, e ro Riccardi?