Ra cittara zeneize 1636/Ballin ambasciou dri pescuei
| ←torna a l'èndexo | Ra cittara zeneize de Balin ambasciao di pescoei (1621) |
Coronna dra giustitia→ |
| Zena, Gioxeppe Pavon, 1636 In corscivo e ligatue. Gh'amanca i acenti aguççi. |
AMBASCIOU
DRI
PESCUEI
A RO SERENISSIMO
ZORZO CENTURION
DUXE DRA
REPUBRICA
DE ZENA.
1.
Da questi scuoeggi, e care chiù vexinne,
Onde spesso re ægue contrafæte
In campagne de læte
Poeran chiappe de spegio crestallinne;
Ond'oura à puinto pa
Addormio com'in letto in ma ro Ma,
Se non se tanto, ò quanto ra sò paxe
Desturba lenguozetto
Quarche maroxeletto
Chi pa ch'innamorou l'erbetta baxe,
Tirou da tanta luxe,
Serenissimo Duxe,
Ch'oura de nuoevo spande ra Cittæ,
Vegno, e m'inchinno à tanta Maestæ.
2.
Chi me sæ, ve ro dixe per menuo
Quest'habito; esto pescio; esto cestin;
Ro me nomme è BALLIN,
Pescou per quarche famma conossuo;
Ballin matto attretanto
Drà fossina, e dre rè, come dro canto;
Ro fin, perche à ri pe ve vegne à cazze
E à fave donativo
D'esto pescio ancon vivo
A nomme dri pescuei dre nostre chiazze,
O chiù presto, per segno,
Per tributo, e per pegno
Dro nostro bon affetto, appresentave
Con questo don, dri nostri cuoe ra chiave.
3.
Parlo in nomme dè tutti; Son ben cærto
Gran Duxe, che parrà troppa arrogansa,
Per nò di confianza,
L'ardì mi oura d'arrivà tant'ærto
Che ri Scettri, e Coronne
Nò se confan con povere personne;
Mà nuoi, ch'à penna d'in Levante uscio
Ro So veghemmo in fronte
A ra chiazza, à ro Monte
Indeferentemente compartio
Pa c'haggiemmo à certessa,
In ra nostra bassessa,
Che rà mesma raxon milite, e voære
Con nuoi, de chì sei So, de chi sei poære.
4.
Ra famma, che de vuoi sentimmo spande,
Serenissimo Duxe, d'ogn'intorno,
Chiù chiæra, che ro giorno;
Chì s'ode resona da tente bande;
Ro nomme, chi ne svoera
Non che tra noi, pe re Cittæ de fuoera,
Come sen cose assæ de ræro inteize,
Produan all'oreggia
Stupo, e maraveggia,
Dà fa re mente attonite, e sospeize;
Se non che tutt'à un tratto,
Praticandose in atto,
Ri miriuin dre vostre varentixe
S'han per chiù grende assæ che nò se dixe.
5.
Oh' se un giorno con nuoi così da parte,
Lasciando per un poco ro paraxo,
Fuoissi prezente a caxo
Vuoi mæsmo, à poei sentine quarche parte,
Quando tutti de venna
Discorrimmo assettæ lì sciù l'arenna;
O pù se ro grou vostro comportasse,
Così per favorine,
Con l'oeggio de seguine,
Pe re Care dri tremaggi, e dre nasse;
Che sentissi ri parli,
Re prediche e ri chiarli,
Che femmo attorno d'ogni vostro fæto
Vuoi mæsmo resteressi stupefæto.
6.
Chi ve prica per hommo de gran pieto;
Chi per un Marte valoroso, e forte;
Repubrichista, à morte;
Chì per un Salamon savio, e discreto;
Chi per ræro Scritto;
Chì per eloquentissimo Orato:
Zughemmo à chi puoe chiue senti ch'ognun
Fa de vuoi tanto cuinto
Come se fuissi à puinto
Un San Teremo in Mà, non che un Nettun;
Aggiustemmo per pruoeva
Che in vuoi solo s'attruoeva
Tutte quelle virtù d'accordio unie,
Che ri atri han trà tutti compartie.
7.
Un porta in Cè con titolo d'eterni
Tanti suuoi de Commissariati
Per Paraxi, e Senati,
In tant'atre vexende de governi;
Atri portan per spegio
Ra franchixe à voi dæta in privilegio;
Atri van chiu avanti incomensando
Fin quanto[sic] eri figiuoe
Con di, c'hei mostrou cuoe
Sempre d'esse nassuo pe ro comando;
Infin trà lo s'accorda
Tutti unij à unna corda
Che dra vostra virtù chiù degno impiego
Ra Coronna saræ d'un Mondo intrego.
8.
Così, con fa dre moen mille foruoi
L’un per l'atro, à regatta invidioxi,
V'erzan, come à maroxi,
Re Montagne dre laude e dri honuoi
Ni se pà d'esse le
Chi no ve mette sciù ri sette Ce;
E spesso avven, che se in passando sente
Questa gran parlaxia
O fregatta, ò tarchia
Chi arrive da Levante ò da Ponente,
Dæto lì sciù re votte
Così à re remme marotte
Quarche paræ per muoeo de barchezzo
S’accostan lò assì tutti à un bolezzo.
9.
Dixan c'han chiù re Corte forestere
In reverensa, e veneration
ZORZO CENTURION
Che nò l'hà Zena mæsma, e re Rivere;
Che fassemmo argumento
Che se chì dixan un, là dixan cento
Oura nuoi, chì s'odimo in sciù ra chiera
L(')aoda cose laodemmo;
Cose intro cuoe portemmo
Confermaro per cosa tanto vera
Pensæ vuoi, Signor caro,
Se in nuoi demmo gustaro;
Se tutti quenti à crio de sciabegotti
Demmo faseve Martiri devotti.
10.
Che chiù? cosa digh'oura d'avantaggio
Nuoeva à mì, da che tratto ra marinna,
De sciù ra fregatinna
Stava à puinto tirando ro resaggio
Ro dì, che à questo grou
Serenissimo Duxe, fuissi asou
Quando à ro rebomba, che fæ ra valle
Dri tiri dre fortesse
Dre pubriche allegresse,
Pe re tanne dri scuoeggi da re spalle
Vì mì con questi oeggi
Giubila pe ri scuoeggi
Re Gritte, ri Cornetti, e ri Ronseggi
Balla, fa lo assì ri suoe conseggi
11.
Vì sott'ægua ro Zin mettese à fæsta,
E per nò comparei così spinozo
Fæto giudiciozo
Con re lanse asbassæ corre à ra festa:
Vì ri faoli, e patelle
Fa chì, è lì balletti, e bagatelle:
Là se veiva ro Porpo, e chi ra Seppia
Oura tutti asbassase;
Oura tutti drissase,
E in muoeo de contegno erze ra greppia:
Chì re stelle dro scuoeggio
Con ra coa de l'oeggio
Votte à ro Ce desfia quelle à guerra
Con di, se un Zorzo e in Cè n'è un atro in terra.
12.
Maraveggie, e stupuoi nò chiù sentij
Pe ra riva dro Ma vei corre à sguasso
L'ombrinna, e ro Loasso
Comme, per cosi di, matti spedij
Fà per tutto cabille
Ro Gronco, ra Morenna, e re anghille
Ro Muzaro, ro Pagaro gentì
L'Orà, ro dentexotto
L’Oggià, ro Nazellotto
Fa treppi, e stravaganse da stupi;
Sta lì come passuin
Ri Tonni, e Sturiuin
In muoeo de cria votti à ra riva
Zorzo Centurion viva, e straviva.
13.
Cose in somma, Signor, che s'oura odisse
Mi mæsmo quarch'un'atro raccontare
Tremeræ d’ascotare,
Nonche de crære, solo se re visse;
Diræ che tra Poeti
S'uzan per fore, e diti consueti;
Pù, da puoe ch'à nota si gren misterij
Hà vossuo deputame
Ra sorte, e destiname
Re refero in sò grou per Evangerij;
Resta dunque concrue,
Da ro manco à ro chiue,
Quanto ne tocche à nuoi mostrave affetto
Se ro fà ri Annimæ sensa intelletto.
14.
Mà perchè ro vorei pesca chiù à fondo
Rò Ma dri vostri honoi de sò natura
Cruoezo fuoe de mezura
Saræ ra mou temeritæ dro Mondo
Resto con offerive
Per schiavi ri pescoei dre nostre rive;
Ri quæ ve pregan con re brasse in croxe
Tutti, come conven,
Per l'utile, e ro ben
Pe ra protettion de queste foxe;
Si comme v'offerimmo,
E BALLIN pe ro primmo
In servixo dra Patria, e dra Coronna
Re famiggie, ra roba, e ra personna.
15.
Restæ dunque felise,
Mentre ch'oura in partise
Chiù assæ con ro cuoe, che in apparensa
BALLIN ve fà profonda reverensa.