Poexie do Gioxeppe Peagallo/Brindixi
| ←Pe-a partensa de P | Poexie de Brindixi |
O Savattin Göscin→ |
BRINDIXI
Chi l'aviæ dito
Sei meixi fa
Che in mezo a tanti
Voî, ti e voscià,
Cioè in mezo a amixi,
A conoscenti,
A sêu, fræ, barbi
E atri parenti,
In mezo a tanti
Boin Reverendi
Dovesse fase
Quest'invexendi?
Che o nêuvo præve
Don Costantin,
Chi minacciava
D'anda a Tacchin,
Anchêu contento,
Allegro e san
O se dovesse
Fa* baxâ a man?
Che a questa töa
O ne troviæ,
Che o primmo posto
O s'acciappiæ,
Ch'o se gödieiva,
Ch'o se scialliæ,
Ch'o faeiva ûn brindixi
A-i Convitæ?
Chi l'aviæ dito?
Nisciûn per bacco!
Ma a Sciâ Cicchetta
A l'é in to sacco;
In sciûn Vascello
A s'é imbarcâ,
E in California
L'emmo mandâ,
E che a ghe stagghe
In California
Ch'a sêunne pûre
A sò sanfornia;
Ch'a gïe l'America
Da çimma a fondo,
Ch'a faççe trûppa
Pe l'atro mondo;
Ché s'a l'aspëta
D'ese ciammâ
Arçichereddena*
A ghe restiâ.
Se poi per caxo
A se stancasse
De quelli paixi,
De quelle ciasse,
E a voëse torna
Fâsea con noî,
A patti primma
Voemmo vegnî.
Ch'a ne promette,
Ansi ch'a zûe
De no fâ* mai
Çerte azioin crûe;
Ch'a lascie in paxe
Chi no a busticca,
Ch'a cangie o nomme
Finn-a de Cicca;
E se ghe säta
De voei laoâ,
Manca manëa
De travaggiâ;
Ch'a vadde pûre
In ti maxelli,
Ch'a faççe in pessi
Manzi e vitelli;
Ch'a se demôe
Pù quanto a vêu
In te bûtteghe
Di pollajêu,
Façendo strage
D'oche e piccioin,
De pollastretti
E de cappoin;
Ch'a mette casa
Pe-i monti e i proei
Dove ciù abbondan
Bravi caccioeì;
Ch'a g'allivelle
A scciuppettâ
Quando son proprio
Lì per scrucciâ,
Tanto che cazze
De primma man
Quello tordetto,
Quello faxan.
Allôa ghe diemo
Tutti: braviscima!
Ghe daemo o titolo
D'Eccellentiscima,
E pe ristoro
E per demôa
Tutte e sò vittime
Portiemo in töa:
Ansi per segno
Do nostro affetto
Ghe daemo ûnn'aa
De pollastretto,
Un bello pesso
De bon vitello,
De brava manza
Un bon tascello;
Ghe regalliemo
Quarche nottoan,
Senza toccaghe*
Mai però a man,
Perché ätrimenti...
Ma continuemmo,
E co-a Sciâ Cicca
No se secchemmo;
A l'é ûnn-a donna
Ch'a l'ha do matto,
A pêu promette
E no stâ a-o patto.
Scignori amixi,
Parenti cäi,
Che bello giorno
L'é questo mai!
Un fræ chi celebra
A primma Messa,
Un fræ chi batte
A stradda stessa
Che da tanti anni
Batto mi ascì,
No sò dî comme,
Ma lì* coscì.
O l'ha davanti
Un brûtto spegio,
Ma son persuaso
Che lê o fä megio.
Sta mattin giusto
L'ho visto andâ
Pe-a primma vòtta
A celebrâ,
E a dîla sccetta
Mi son restôu
Do sò contegno
Edificôu.
Aviesci dito
Ch'o lè un Angietto...
Ma no, o ven rosso...
Sia per non detto.
O panegirico
Da sò bontæ
O l'é conträio
A-a sò umiltæ.
Femmoghe dunque
In allegria
Un bello brindixi
E a sæ finïa.