Poesie drò Signò Giurian Rossi/Viaggio de Venetia con Dame/Canto terço
| ←Canto segondo | Ro viaggio de Venexa de Canto terço |
| da-o manoscrito Ricci 177 do Comun de Zena, www.storiapatriagenova.it |
1
Così va o mondo un'ava picceninna
Ve darà dell'Amiè senza mesura
Soave odò ra roeza mattutinna
Ma sei sogetti à un'aspera pontura
E come ro chigoemaro vexinna
Stà d'appresso à ro so dose l'amarura
E se aven che Amò, gioia, e diletto porte
O tira derriè a unna vitta mille morte.
2
Così sussedè apointo à Nicheroso
Che mentre o fa ro conto senza l'Hoste
Da veise chioeve re venture in scoso
Ghe fiocca re desgratie sciù re coste
Onde per no parei dro tutto avoso
O meschin se l'abbacca pe re Poste
Perche, se un bello morì ra vitta honora
Un bello fuzì scampa ra vitta ancora
3
Così correndo dentro un Tanabugo
Ro meschin s'intaffura a moen scrollando
E fin all'hora dro Rattopenugo
O stè Bacco, e Cupido giastemando
In tanto Poro Andria là tutt'in sugo
Stava re soe fortunne fabricando
Così va o Mondo, mentre quello è rauzo
Questo trionfa in giubilo, in appraozo.
4
Lì se ne stava ro sciò Por'Andria
A uzà con re soe Dame diligenza
Che un Aze comperdon dra compagnia
N'havereiva portoù tanta patienza
E figurandose intra fantasia
L'urtimo segno dra corrispondenza
Zà zà se pà vittorioso, e stima
De portà da o so ben ra spoeggia prima
5
Onde non se puoè crè quante finezze
In quanta Impression l'amigo fè
E biaoù liè, se in quello giorno o poesse
Fermà ro Sò, come fè Giosuè
Ma de Tantalo son re suoe dosezze
Chi se ficca sciù quello, chi non è
Non se confan ri feti a re apparenze
E orbe son chi zù nostre appetenze
6
Ma re Dame veggando, che in effetto
Arde Mirtillo, e se consuma, e taxe
Lascian lì d'intra camera soletti
E l'Amante, e l'Amà in santa paxe
Ma a ro minchion ghe cazzè ri noetti
Puoè vergognoso in vergognosa fraxe
A penna per dà gusto a ro Diao
O ghe disse, Signora come stao
7
Doppo che o l'ha spuoù questa parolla
Ti[sic] ghe sparega li tutte re Dame
Che ro levan da fà ra gramignolla
E restà desconsoù ro gaudiame
Onde Cupido, chi no ghe ra molla
Con ra privation cresce ra famme
E in tutto quello giorno abbarlugoù
O restà, che o pareiva inspiritoù
8
Re Dame a carozzà pe ra Cittè
Menan ro Poponetto a ra demora,
Ma in quella Tiesta chiù all'hora, che moè
Cupido, e Bacco à scarso ghe lavora
Mentre lì à son de motti, e novitè
Piggian ra votta, e de senà ven l'hora
Là in quello canto Nicheroso mio
A son de Bacco, e Amó, s'era adormio.
9
E in quello che ronfando o se ne stà
Assoenandose lì mille bernizzi
Eccote apointo un servitò de chà
Chi pareiva ro Poere dri scavizzi
Con un bacco, astizzoù caminna là
E lì de bastonaro sciù ri pizzi
Te l'incomensa lì a rimproverà
Che o s'era ascoso là per arrobà
10
Nicheroso a sto annontio s'inzenoggia,
Lustrissimo Signò ohimè perdon
Vosignoria mi piggia per l'agoggia
Benche furto n'è o miè, ni ladro son
Così mentre lì quello stroffoggia
Questo fremendo in furibondo son
Doppo unna serchia fetaghe intra stacca
Sparà in lampi de cado ra borrasca.
11
Ma mentre Nicheroso scappa via,
Ven ra noette, e per divera in doì versi
Tornan re Dame, e tutti all'hostaria
Senemo, e andemo a lietto là reversi
Stava li Nicheroso, e Poro Andria
Unij sì, ma con pensiei diversi
Che un giastema Piaxenza, e Parma assì
L'atro no se vorrè moè partì de li
12
Era ra noette, e zà in ri corpi nui
Regolava ro soenno i nutrimenti
E mentre vigillavan tutti dui
Nicheroso sborrà serti lamenti
Ch'havereian movuo pietè in ri Regni bui
A quelle furie arraggiè de serpenti
E con ri segnè in sciù re spalle havui
Fè i soè lamenti con questi atri luri
13
Non te contenti o disleale Cupido
Fà de questo miè coè spietatti scempi
Che ancon ti voe de chiù perfido infido
Fame intro miegio pezorà ri tempi?
Invendicato ancor piango e m'assido?
O Cieli, O Dei, perche soffrir quest'empij
No voeggio sopportara fe' de can
Se ghe dovesse lascià ro cordoan
13
Figgio d'un Zoppo, e d'unna Vaccantando
Mastro è di ferità, vo superarlo,
Liè pensa fà de mi, come d'Orlando
Si o piggia errò, ma dove son che parlo?
Se da un bell'oeggio in casa de Morando
Zà m'è steto intimoù, guardate Carlo
Per si bella occasion se moere in tanto
O vorreiva dì, ma l'interrompì ro pianto.[sic]
14
Mentre liè con ra so malinconia
Va bagnando de lagrime re masche
Stà porzendo l'oreggia Por'Andria
E in mille dubbij amò fa ch'o s'incasche
Sata in ballo a sto son ra girosia
E ficcandoghe in tiesta atro che frasche
O dixe a Nicheroso, Infame menti
Liè respose ti parli infamementi
15
Parlo miegio che ti, quello repiggia
Ti voe fà dro mè Rivà, oh che ti è matto
Quello bocchin chi fa, che amò me striggia
Feto è per Cavalieri, mirero all'atto
S'ascada infin ro sangue, e vatt'a piggia
Ra potenza fra ló fa gran contrasto
E se non intrava Ergasto pe ro miezo
Schiuppava quarche trippa lì a ra piezo.
16
Stava Ergasto fra lò lì predicando
Perche no ghe seguisse desbaratti
Ma sempre chiù esti chi prefidiando
Ragognan tutta noette come Gatti
E già schiattava l'Arba all'hora quando
Va Nicheroso, e senza fà sciaratti
Se lanza duria buria a Por'Andria
E con un battorezo o ro desfia
17
Quà feroce cavallo a ro fatigoso
Honò dell'arme vincitò sè votto
Se o sente un Tamburin tutto fogoso
Rode o fren, sappa ra terra là revotto
Tà Por'Andria sentendo Nicheroso
Sbraggiando ruzze in Acheronte votto
Cria, ma si per raggia o se confonde
Che no s'intende quello ch'o responde
18
Ergasto leva i Arme da per tutto
E liè sbitta in coxinna, oh quest'è bella
O troeva un schinco viegio de prezutto
E ancon con l'oerio dentro una poella
Cosi vointo, e bezointo, e tento, e brutto
Eccate lì Sanson con ra mascella
Smarrio ro bello mostazzo in un corò
Fra o Giano, e l'Etiopico candò
19
Dall'atra parte Nicheroso ven
Che no trovando atr'arme, haveiva un asta
Criando, est'arma a pari toè conven
Per berrosdo si grosso un'asta basta
Anzi quello responde, e t'oeggio ben
Azebibà con sta paella[sic] guasta
Come t'ho infarinoù d'esta caize
Giusto com'unna Rena t'oeggio frize
20
Son mi, dixe quell'atro, ch'oeggio fà
Dre mesime arme toè, ro mesimo a tie
Che t'oeggio ra barippa crivelà
Giusto comm'unna poela da rostie
E missa in resta l'arma despointà
Unna stoccà te gh'alliviello lie
Ma perche l'asta in ro colletto arriva
Ra pelle morta ghe sarvà ra viva
21
Aura sì ch'a va mà, poei figurave
Vei combatte un Pigmeo con un Gigante
Ò pù unna Gariotta con unna Nave
Ò sè, ro Can levrè con l'Elefante
Perche un è grosso, e grasso, e greve, e grave
L'atro è magro, e sottì, destro, e volante
Por'Andria tira in questo ro presutto
Che s'o l'attacca, o ro fregoggia tutto
22
Non ve diggo atro, che con tà fracazzo
De quello schinco in terra ch'o se caccia
Siei parmi, e miezo d'intro cazinazzo
Dirè de chiù, ma o vero de fazo ha faccia
In tanto liè de noevo erze ro brazzo
Quello va sotta, e de ferì precaccia
Digando, ò eh, s'havesse un cotelletto
Te vorreiva scannà com'un Porchetto
23
Por'Andria dra senestra un pugno tira
Ch'haverè deruaou doì Balluardi
Quello ro schiva, e sì o l'avampa d'ira
E s[']o perde a stima, o venze tardi
Sgambillao Nicheroso, e se retira
Girando chi, e là con storti sguardi
Perche s'o troeva un sascio pe ra via
O ghe oe fà, come Davide à Gollia
24
Ma infin quello l'incaza, e da levente
Mentre apointo o se voze, o te ghe lascia
Andà dra Poela zù un gran fendente
E ghe depenze à oerio unna ganascia
Se quattro dia ro corpo era chiù rente
O ghe levava i trentesiei de cascia
Renditi vinto, all'hor, ci disse, e basti
Che potrai dir che contro me pugnasti.
25
Tutto foego rinforza anzil'estremo
Tà Nicheroso in atto menazzante
Usa ra sorte to, che ninte temo
Pensi tu de viltè tentà Argante
E reppricando haura haura se viremo
Ghe caccia l'asta in loego stravagante
Se Por'Andria no teme ro peto audace
Natura de timò, no ro fè capace.
26
Quà ne l'arpestre serve orso, chi senta
Duro spiedo nel fianco in raggia monta
Tà Por'Andria indomito deventa
E tutto in furia Nicheroso affronta
Liè con un sguardo, e gesto ch'o spaventa
Lanzà quella Paella vointa, e bezonta
E riuscendo esta botta chiù che bella
O te ghe fè unna scoffia dra Paella.
27
Ma de furia ro corpo avanti andando
Onde ra Paella se squarzà ro fondo
E ra schoffia revertega vegnando
Ghe restà re sciorette così a tondo
Così retento ro meschin restando
L'ottava maraveggia d'esto mondo
Liè te ro zira intra Paella giusto
Com'unna gera dentro casafrusto
28
Poco mancà, che ro meschin n'andasse
A dà un stroescio intro Po, come Fetonte
Perche serto me croù ch'o ro buttasse
Chiù in là, che l'Eremito Rodomonte
Ma ra Gente per poia che o l'amazzasse
Ghe corsan tutti adosso, fin ro Conte
E li in restreito per vegnì à ra fraxe
Per forza, e per amò i fen fà paxe.
29
Solo ghe foì quest'inconveniente
Che in fazza a Nicheroso per ventura
Da quello tà scottizo ruzenente
Etterna ghe restà l'imprimatura
Saon, Brenno, Limon, ni axioù boggente
Moè gh'ha posciuo schierì ra pielle scura
Si che d'arbo ch'o l'era aura così
L'è restoù scuro giusto, come chi
30
Quinci dal Lido il Canape sciogliendo
Fen dre devotioin solite a fase
Poè sciu ri caxi occorsi lì rezendo
Commensan sciù Piaxenza a mottezase
L'antò, dixan re Dame sorridendo
No den chiù morti à tora aregordase
Se gh'e quarcun ch'ha doeggie se re tiegne
Con noì, chi n'oè stà alliegro, no ghe viegne.
31
Da si bonna raxon ogn'un contento
S'alliegra e rie, ogn'un dixe ra soa
E viva, e viva ogn'un criando apointo
Passa parolla in fin da Poppa à Proa
Comensà Nicheroso in quello pointo
Lode, canzoin, sonetti con ra coa
E unna voxe in terzo femmo lie
Ro Casciè nostro, Nicheroso, e mie