Piaggio M. - Poesie 1846/Prefazioîn e Reviste da Çittæ/1816
| ←Prefazion, Anno 1815 | Prefazioîn e Reviste da Çittæ de Prefazion, Anno 1816 |
Prefazion, Anno 1817→ |
| (ediçion Pagan - 1846) |
*
L’anno nêuvo o l’è argomento
De profondo pensamento,
E de seria riflescion
Pe ogni stato e condizion.
In sto secolo de lûmmi,
De scoverte e de portenti,
Tûtti fan proponimenti
De cangiâ vitta e costûmmi;
Ognûn forma o so progetto
De voeì diventâ perfetto.
Per exempio gh’è o padron
D’ûnn-a casa d’allegria
Chi camminn-a ä perdizion,
O vêu mette economia,
O l’acciappa pe ogni verso
L’orgogliosa so moggê
Per persuädia.... tempo perso!
A vêu fâ cos’a vêu lê,
Modde, teatri, veggie, töa,
Coscì a casa a va in malöa,
E o padron n’è ciù padron
Pe-a sûperbia e l’ambizion.
Per l’inverso da medaggia
Gh’è ûnn-a brava moggê e moæ,
Che meschinn-a a prega e a sbraggia
Per fâ ûn bravo majo e poæ,
Che scordando i so figgiêu,
O dà drento ciù ch’o pêu
A-o vistoso patrimonio,
E a-i dinæ do matrimonio;
E con tûtto o dî e o so fâ,
L’ ægua a pesta in to mortâ,
D’emendâlo no gh’è verso:
Tûtta breiga e tempo perso.
Quello figgio de famiggia
Chi scialacqua i so dinæ
In continui carlevæ,
Ingannando qualche figgia,
O vorrieiva ûn pö astallâse,
Coscì o çerca de majâse;
O çervello o se lambiccâ,
Chè o vorrieiva ûnn-a moggê
Bella, zovena, ma ricca.
Che a virtù a no fa per lê.
Perchè poco o se n’intende....
L’anno passa in quest’idea,
Ma o continua a spande e spende,
E o ven pezo ch’o non ëa;
Che o se cange no gh’è verso:
O l’è tutto tempo perso.
E quell’atro babbazzon
Chi è fantin, cioè fantinon,
Perchè o passa a quarantenn-a
E o n’accûza trenta appenn-a;
Tûtti i anni o se proponn-e
De piggiâ lê ascì moggê,
Ma o no trêuva mai pupponn-e
Che ghe possan fâ per lê;
Ghe dà breiga o celibato,
Ghe rincresce o cangiâ stato,
O doveÌ spende dinæ,
Perde a quete e a libertæ.
Passa i giorni, i meixi e i anni,
Doppo aveìne scartôu tante,
Quand’o l’aviä sciûsciant’anni,
O spoziä a so governante.
Arpagon, tosto invegïo
Ne-i ûzûre, o l’ha sentïo
Di rimorsci de conscienza,
O vorrieiva restituî...
O l’aspëta l’occorrenza,
Ma per lê a no pêu vegnî;
Circondôu da-i so dinæ,
Mille votte o i ha contæ ,
O vorriæ çentûplicâ
A fortûnn-a ch'o possede,
O se scorda de mangiâ.......
Ma vegniä presto l’erede
Chi fä lê a restitûzion
Con dâ fondo a-o bello e a-o bon;
Che o s’emende no gh’è verso;
O l’è tûtto tempo perso.
L'intrigante e o mastrûssê
Son contenti do mestê,
E no pêuan cangiâ natûa,
Pin d’inganni e d’impostûa,
E filantropia vantando,
O bonommo van spellando,
E meschin chi se ne fia!
No gh’è verso che s’emendan,
O l’è tempo cacciôu via,
Comme tanti ascì che vendan.
Tûtti i anni se proponn-e,
E da-e mæxime personn-e,
D’emendâse e de cangiâ,
Ma son voti da mainâ;
Perdan comme a vorpe o peì,
Ma i so vizj mai davveì.
No se fa in quella bûttega
De mezûa mai giûsta e intrega;
Pezâ in l’atra gh’è proibïo
Senza dâghe ûn pö do dïo;
Quella a spaccia a mercanzia
Per genuinn-a imbastardïa;
Questa o fabbrica do pan
Ch’o pâ fæto per dâ a-o can;
L’atra a vende di fidê
Neigri e amäi ciù che l’arfê;
Ve fa beive ûnn’atra o vin
Chi è ûn veleno sopraffin,
E quell’atra pe êujo bon
Un pö d’êujo de strasson!....
Ma frattanto fan dinæ,
E de ciù g’han o quaddretto
Co-a lampetta.... oh iniquitæ!
Pâ che o fassan per caitæ,
No ghe n’è ciù un dïo de netto!
Serve assæ a meta e i cavæ
Quando e arti son guastæ,
E che ognûn pêu mette anchêu
Bûtteghin de cose o vêu....
O l’è tempo cacciôu via....
Ma parlemmo d’allegria.
Dæ ûn pö mente ä sciâ Pimpetta
Chi fa sempre a zovenetta,
Tûtti i anni a l’ha trent’anni,
E che a o dixe son vint’anni;
In qualunque lêugo andæ
A fâ a bella ghe a trovæ,
A-o passeggio, in gëxa, a-o teatro....
Sciâ Pimpetta, ghe vêu atro!
Vanni a-o spëgio presto presto
Ti veddiæ o to dixinganno,
Tûtti i anni cresce ûn anno,
E... o te diâ lê megio o resto.
E quell’atro ciaravalle
Che l’è ûnz’anni che o camalla
Mezo secolo in scë spalle!...
Comme fa a-o lûmme a farfalla
Lê va sempre intorno a-e figgie
A fâ o bello e o spaximante,
No gh’è modda ch’o no piggie,
O veddeì sempre galante,
Profûmmôu da cappapê;
Questo Zovenotto vegio
O so tempo o perde a-o spëgio
Per fâ andâ i anni inderrê,
Ma o no vedde tante rûghe,
Quelli so êuggi co-e leitûghe,
A dentêa meza a postisso,
Quelle moen de recanisso,
Quello collo chi ghe pende,
E con tûtto o resto apprêuvo....
No gh’è verso ch’o s’emende,
O l’aspëta l’anno nêuvo
Per tiâ in tæra e mëgâ i guai,
Ma quest’anno o no ven mai.
Quante belle speransette
Dà o nêuv’anno a-e figgie tutte,
Mercantili, belle e brûtte,
Ragazzonn-e e ragazzette,
De vegnî spozæ e de poeì
Comandâ ûn pö a so piaxeì!
Van pascendo o so genietto
Fra a speranza e fra l’affanno
Per l’oggetto prediletto..
Passa i giorni, i meixi e l’anno
E poi, restan mincionnæ,
Che l’amô do loro oggetto
O consciste in ti dinæ....
Oh interesse maledetto!
Oh metallo onnipossente,
Che ti è l’idolo da gente
E de tutto o gran segretto!....
Per ti bello se fa o brûtto,
Se converte in gioia o lûtto,
Per ti o vizio o ven virtù,
A veggiezza zoventû,
O birbante galantommo,
L’ignorante çimma d’ommo;
L’è per ti a voentæ raxon....
Ma che sciollo! dove son?
Vaddo fêua do semmenôu,
L’argomento m’ho scordôu.
Dunque vegno ä conclûxion,
E v’annunzio con piaxei
Che o nêuvo anno chi comensa
E che tûtti ve gödieì
(Comme spero) pe eccellensa,
O dev’ëse ûn anno bon
E da-i atri ben diverso,
Perchè ognûn ghe troviä verso
De corrëze i so difetti
(Mi pe-o primmo) e de vegnî,
No ve diggo zà perfetti,
Ma da fâse compatî;
No sentiemo ciù opprescioîn,
No veddiemo malazioîn,
S’ha da fâ di gren majezzi,
Sûccediä di gren battezzi,
Se veddiä sempre regnâ
Amô e fedeltæ in mulieribus,
E da-o ricco dispensâ
Quod superest paiperibus
A Giûstiziâ e a Paxe ûnïe....
No vorrieivo di böxïe,
Dunque fasso sciallâ o diavo:
Stæme allegri, ve son scciavo.