Piaggio M. - Poesie 1846/Esopo Zeneize/O Spozôu e l'Aze
| ←O Luigi e o Quattrin | Esopo Zeneize de O Spozôu e l'Aze |
O Berrettin Magico→ |
FOA CII.
Sciortì ûn giorno d’in ta stalla
Un bell’Aze misso in galla
Con bardella, brille, fiocchi,
Gasse, ciocche, pendalocchi,
Ciûmme, strinche, frexettin,
E ûn mïon de sûnaggin!
O l’aveiva a pansa pinn-a,
Che o vegniva da pittâ
Fave, fen, faenn-a mescciâ
Co-i beschêutti da reginn-a
(Fabbrichæ da-o carubbâ).
O doveiva ëse montôu
Da-o padron ch’o l’ëa spozôu
Per portâlo a dî de scì.
Tûtti quelli che passavan
Per ammiâlo se fermavan.
Lê de véddise coscì
Tûtto misso in eleganza,
E da tanta gente ammiôu,
O s’è sûbito stimmôu
D’ëse bestia d’importanza;
E scordandose o mincion
De scarbasse e do baston,
O s’impiva d’arroganza,
E o se dava do gran ton
Con tiâ rägni co-i mordenti,
Alzâ i oëgie, mostrâ i denti,
Sliccâ cäsci e scrollâ a cöa,
E passando di so fræ
Minacciâghe de dentæ.
Finalmente vegnì l'öa
De partî: va per montâlo
O Spozôu, ma cose voeì?
No gh’ëa lêugo d’assûffâlo
Ni pe-a brilla, ni pe-o peì,
Tiando cäsci a ciû no dî,
E di rägni da insordî,
Nè gh’ëa verso d’astallâlo.
Ho capïo! (disse o patron
A quell’Aze insûperbïo
Perchè moscio e ben vestïo),
Te mettiö presto in raxon!
O se fè portâ ûn baston,
E con quattro bastonnæ
In sciö collo ben schissæ,
O ghe desse ûnn-a lezion,
Che o no s’è mai ciù scordôu,
E o l’è sibbri diventôu.
O voî atri, ch’eì megiuôu
E de stato e condizion,
Perchè a sorte a aggiûttôu,
No vegnî sûperbi e fëi,
No fæ tanto l’arrogante
Che fortûnn-a a l’è incostante,
Poeì tornâ pezo che n’ëi.
