Piaggio M. - Poesie 1846/Esopo Zeneize/O Gallo e o Diamante
| ←A Figgia e l'Erba Sensitiva | Esopo Zeneize de O Gallo e o Diamante |
O Cavallo, o Bêu, l'Agnello e l'Aze→ |
FOA XXII.
Un Galletto do Moinâ,
Unn-a votta in to raspâ
O trovò in ta tæra ascoso
Un Diamante portentoso,
E ghe desse ûnn-a beccâ,
Ma non poendolo collâ,
O capì, ch’o n’ëa per lê,
O portò da-o Giojellê,
E o ghe disse indifferente:
Questa prïa coscì lûxente
A sä bella, e de valsûa,
Ma per mi a l’è troppo dûa;
M’ëa ciù cäo trovâ do gran,
Un bacillo, ûn pö de pan.
Unn-a votta a ûn ignorante,
Solenniscimo pedante,
Un so Barba, chi creppò,
Per legato o ghe lasciò
Un sûperbo e rinommôu
Quaddro in legno, assæ stimmôu
Do Pittô Raffæ d’Urbin,
O portò da-o Repessin,
E azenasso de natûa,
Gran nemigo da pittûa,
Solo amante do dinâ,
O ghe o dè pe ûnn-a sasciâ,
E o ghe disse: pe ûn quattrin
Daeivo ascì Raffæ d'Urbin.
Pochi Galli do Moinâ
Se porrieiva anchêu trovâ,
Ma quanti Axi interessæ,
Solo amanti di dinæ!
